Jetisýda jol apatynan úsh adam kóz jumdy
TALDYQORǴAN. KAZINFORM - Alakól aýdanynda Almaty-Óskemen tasjolynyń 568 shaqyrymynda adam ólimine ákelgen jol kólik apaty oryn aldy. Jol apatynan úsh adam qaza tapty.
Aldyn ala boljam boıynsha, Toyota Carina E kólik júrgizýshisi joldyń qarama-qarsy jolaǵyna shyǵyp ketip, Mercedes Benz kóligimen soqtyǵysqan.
«Apat saldarynan eki júrgizýshi, sonymen birge Toyota Carina E jolaýshysy alǵan jaraqattarynan oqıǵa ornynda kóz jumǵan», — dep jazdy óńirdegi polıtsııa departamentinen.
Atalǵan fakti boıynsha qajetti saraptamalar taǵaıyndalyp, sotqa deıingi tergeý amaldary bastaldy.
Vedomstvo júrgizýshilerdi jol qozǵalysy erejelerin qatań saqtaýǵa shaqyrdy.
«Jol qaýipsizdigi talaptaryn buzbańyzdar jáne eń aldymen jyldamdyqty asyrmańyzdar. Avtokólikti basqarý kezinde jaýapsyzdyq pen nemquraılylyq, ádette, qaıǵyly saldarǵa, kóbinese adamdardyń ólimine jáne mertigýine ákeletinin umytpańyz», — deıdi jol saqshylary.
