Jetisýda sıntetıkalyq esirtki saýdalaǵan azamat 7 jylǵa sottaldy

TALDYQORǴAN. KAZINFORM — Jetisý oblysy prokýratýrasynyń úılestirýimen polıtseıler Jarkent qalasynyń aýmaǵynda tyıym salynǵan zattardy taratýmen aınalysqan 20 jastaǵy Almaty turǵynyn ustady. Tergeý amaldary barysynda «H» esimdi azamattyń «Mefedron» sıntetıkalyq preparatyn Panfılov aýdanynyń ártúrli jerlerinde qaldyrý arqyly taratqany belgili bolǵan.

Sot «H» esimdi azamatty esirtki satqany úshin kináli dep taýyp, ony 7 jylǵa bas bostandyǵynan aıyrdy. Úkim zańdy kúshine endi — delingen habarlamada.

Jetisý oblysy prokýratýrasymen quqyq qorǵaý jáne arnaıy organ ókilderi azamattardyń densaýlyǵy men qaýipsizdigin qorǵaý maqsatynda esirtkiniń, ásirese sıntetıkalyq esirtkiniń zańsyz aınalymynyń jolyn kesý boıynsha belsendi jumysyn jalǵastyrýda. Eske salaıyq buǵan deıin Taldyqorǵan turǵynynan 20 mln teńgeniń esirtkisi tárkilengenin jazǵanbyz. 

Polıtsııa qyzmetkerleri esirtki zattaryn óndirý, saqtaý, tasymaldaý jáne asa iri mólsherde ótkizý sııaqty zańsyz áreket jasaǵandarǵa múlki tárkilenip, 10 jyldan 15 jylǵa deıingi merzimge bas bostandyǵynan aıyrý jazasy qarastyrylǵanyn eskertedi.