Jetisýda 47 eldi mekendi sý basý qaýip bar
TALDYQORǴAN. KAZINFORM- Óńirde 47 eldi mekendi sý basý qaýpi bar. Bul týraly Jetisý oblystyq tótenshe jaǵdaılar departamenti málimdedi.
Jetisý oblystyq TJ departamentiniń málimetinshe, sý basý qaýpi joǵary táýekeline Alakól, Eskeldi, Kerbulaq jáne Kóksý aýdandary, al ortasha táýekelge Panfılov, Sarqan aýdandary, tómengi táýekelge Taldyqorǵan, Qaratal, Aqsý aýdandary jatady. Al óńir aýmaǵyndaǵy ózen-kólderdiń jaǵdaıy turaqty.
- 2025 jylǵy sý tasqyny kezeńine arnaıy josparlar bekitilip, 10 eldi mekende qaýip barynsha tómendetildi (Abaı, Eshkólmes, Arharly, Beskól, Kóktýma, Qopa, Úshtóbe (Qaratal-saıajaı), Kóktal-Arasan, Qaratal, Musabek). 2025 jylǵy sý tasqyny kezeńine daıyndyq aıasynda, ótken jyly 17 shaqyrym sý burý arnalaryn ornatý jáne tazartý, 400 metr qorǵanys bógenderin ornatý jáne jóndeý, 4,7 shaqyrym ózender men kanaldar arnalaryn mehanıkalyq tazartý, 10,6 shaqyrym ózen arnalaryn túbin tereńdetý, túzetý jáne jaǵalaýlaryn nyǵaıtý jumystary isteldi, - dedi Jetisý oblystyq tótenshe jaǵdaılar departamenti.
Departament mamandary 43 eldi mekende sý basý qaýpi azaıtyldy, qalǵan 4 eldi mekende jumys jalǵasyp jatyr dep esep berdi. Jalpy, oblys boıynsha qar jamylǵysynyń qalyńdyǵy 4-72 santımetr. Bıyl Alakól aýdanyndaǵy Lepsınsk jáne Kerbulaqtaǵy Qoǵaly aýylyna qar mol jaýǵan. Al jer toń bolyp qatqan.
Alakóldegi Aqjar aýylynda topyraqtyń betki qabaty 1 metr tereńdikke deıin qatyp jatyr. Aqpan aıynyń aýa raıy boljamyna sáıkes, ekinshi onkúndikte aýa temperatýrasy kúndiz +15 gradýsqa deıin, túnde + 5 gradýsqa deıin jaǵarylaýy múmkin. Mamandar kúnniń kúrt jylynýyna baılanysty aqpan aıynyń sońy men sáýir aıynyń basyn qaýipti kezeńge jatqyzyp otyr.
Eske salaıyq osyǵan deıin Jetisýda evakýatsııalyq pýnktterdi anyqtaıtyn QR-taqtaıshalar ilingenin jazǵanbyz.