Jetisýda 21 jastaǵy azamattan 111 oram esirtki tárkilendi

TALDYQORǴAN. KAZINFORM — Panfılov aýdanynda zańsyz esirtki saqtaýmen aınalysqan 21 jastaǵy Túrkistan oblysynyń azamaty ustaldy. Tergeý amaldary júrgizilýde.

Jetisý oblystyq polıtsııa departamentiniń málimetine súıensek tintý kezinde kúdiktiden 111 oram esirtki tárkilengen. a-PVP psıhotroptyq zaty onyń syrt kıiminiń qaltasynan jáne sómkesinen tabylǵan.

Sonymen qatar, polıtsııa qyzmetkerleri esirtkiniń jasyryn qoıylǵan oryndaryn anyqtap, taǵy 11 oramdy tapty. Jalpy alynǵan a-PVP mólsheri 63,3 gramm boldy. 

— Qazirgi ýaqytta kúdikti qamaýǵa alynyp, tergeý amaldary júrgizilýde. Zańnamaǵa sáıkes, esirtki jáne psıhotroptyq zattardy zańsyz saqtaý úshin 10 jyldan 15 jylǵa deıin bas bostandyǵynan aıyrý jáne múlkin tárkileý jazasy qarastyrylǵan, — dedi Jetisý oblystyq polıtsııa departamenti.

Eske salsaq, osyǵan deıin Jetisýda 2 iri esirtki zerthanasynyń joıylǵanyn jáne Alakól aýdanynda taksıden 11 mln teńge urlaǵan kúdiktiniń ustalǵanyn jazǵanbyz.