Jetisý oblysyndaǵy Kóksý ózeninde sý deńgeıi kúrt kóterildi

TALDYQORǴAN. KAZINFORM – Jetisý oblysynda kún kúrt jylynyp, Kóksý ózeninde sý deńgeıi kóterildi. 

Áleýmettik jelide qatty aǵyp jatqan ózen sýynyń vıdeosy tarady. 

Kóksý aýdany ákimdiginiń habarlaýynsha, 29 sáýir kúni saǵat 15:30-da ýaqytsha sý ótkizgish qurylystaryn ornatý kezinde Kóksý ózeninde sý deńgeıiniń kúrt kóterilgeni tirkeldi. Bul kúnniń kúrt jylynyp, ózen arnasyna sýdyń kóp quıylýynan boldy. Sol sebepti ýaqytsha aınalma kanaldaǵy sýdyń deńgeıi jobalyq deńgeıden asyp ketken. 

– Ýaqytsha arnany sý shaıyp ketpes úshin, sondaı-aq qurylys tehnıkasyna zaqym keltirmeý maqsatynda Kóksý ózeniniń ulǵaıǵan kólemin ótkizý úshin magıstraldyq arnanyń joǵarǵy jáne tómengi bógetterin ashý týraly shuǵyl sheshim qabyldandy, - dep túsindirdi ákimdikten. 

Jergilikti ákimdiktegiler atap ótkendeı, gıdrotehnıkalyq qurylysta jumys sý tasqyny aıaqtalǵanǵa deıin ýaqytsha toqtatyldy. Jumysty qalpyna keltirý týraly qosymsha aqparat beriledi. 

– Kóksý ózeniniń arnasyna sý jiberý jumystary qurylys normalary men qaýipsizdik erejelerin qatań saqtaı otyryp júrgizilip jatyr. Qazir Kóksý ózeni qorshaǵan ortaǵa nemese turǵyndarǵa qaýip tóndirmeıdi, - delingen habarlamada. 

Osyǵan deıin Jetisý oblysynyń Aqsý aýdanynda kópirdi sý shaıyp ketken bolatyn.