Jetisý oblysynda jıyn-terim naýqany aıaqtalyp qaldy
Jetisý oblysynda masaqty-dándi daqyldar, ıaǵnı arpa, bıdaı, suly tolyǵymen orylyp, 483,9 myń tonna astyq bastyryldy, ortasha ónimdilik gektaryna 20,6 tsentnerden keldi, dep habarlaıdy Kazinform.
Jetisý oblysy ákiminiń baspasóz qyzmeti málim etkendeı, sebilgen 324,426 myń gektar dándi daqyldyń 314 myń gektary nemese 96,8%-y orylyp, 786,3 myń tonna astyq bastyryldy. Ortasha ónimdilik - gektaryna 25 tsentner. Sondaı-aq 1,07 myń ga jerden 3,41 myń tonna kúrish jınalyp, ortasha shyǵymy ár gektarynan 32 tsentner boldy. Kókónis pen baqsha daqyldary da tolyq jınaldy. Kartopqa toqtalsaq, 11,9 myń gektardan 245,3 myń tonna jınalyp, ortasha ónimdilik gektaryna 206,8 tsentnerge jetti.
«Sol sııaqty dándik júgeriniń 56,99 myń gektary nemese 81,7% jınalyp, 298,9 myń tonna ónim alyndy. Maıly daqyldardyń 80,6 myń gektary nemese 90,7% jınalyp, 140,2 myń tonna ónim alynsa, qant qyzylshasynyń 7,6 myń gektary nemese 87,3% qazylyp, 309,8 myń tonna ónim jınaldy, ortasha ónimdilik gektaryna - 405,1 tsentner», - dep habarlady oblystyq ákimdikten.
Al dıqandar bıyl egistiń bitik shyqqanyn aıtady. Aqsýlyq Rınat Ádespaev 10 jyldan beri dándi daqyl ósirýmen aınalysady. Zamanaýı qondyrǵy paıdalanady, endi basqa da tehnıkalardy satyp almaq.
«Bıyl 800 gektarǵa bıdaı men soıa, 50-ine jońyshqa, 25 gektarǵa qyzylsha septik. 2022 jyly sý shashyratatyn qondyrǵy satyp alyp qoıdyq. Bıyl mol ónim aldyq», - dedi Rınat Ádespaev.
Eren eńbegimen kópke úlgi bolǵan Rınat Ádespaev mol ónim alý birneshe sebepke baılanysty ekenin tilge tıek etti.
«Aýa raıyna, adamǵa baılanysty, jerdiń qunarlyǵyna baılanysty, qaraýyńa baılanysty. Bári jaqsy bolsa jaqsy ónim alasyń. Ýaqytynda seýip, ýaqytynda durys qaraý qajet. Der kezinde dárisin seýip, sýǵaryp otyrsań eńbek esh ketpeıdi», - deıdi ol.
Aýdan ortalyǵynda isin dóńgeletip otyrǵan azamat 10 adamdy jumyspen qamtyǵan. Bolashaqta sharýashylyqqa jańa qondyrǵylar alyp, kásibin keńeıtýdi josparlap otyr. Aýyl sharýashylyǵy mınıstrligi atap ótkendeı, Qazaqstan Respýblıkasynyń agroónerkásip keshenin damytýdyń 2021-2030 jyldarǵa arnalǵan tujyrymdamasy aıasynda «QazAgroQarjy» AQ jyl saıyn 2023-2025 jyldary 30 mlrd teńgege deıin uzaq merzimdi bıýdjettik nesıe bólýdi kózdep otyr.
