Jetisý oblysynda segiz jańa sý qoımasy salynady

TALDYQORǴAN. KAZINFORM – Jetisý oblysynda sý únemdeý tehnologııalary belsendi qoldanylyp otyr. Bul týraly Úkimettiń baspasóz qyzmeti málim etti.

Jetisý oblysynda vegetatsııalyq kezeń turaqty negizde ótýde. Óńir ákimi Beıbit Isabaev sý qoımalarynyń ortasha tolý deńgeıi 70%-dy quraıtynyn, barlyq egis alqaby egindik sýmen qamtamasyz etilgenin habarlady. Bıylǵa josparlanǵan 1 mlrd m3 sý kóleminiń 250 mln m3 mólsheri sharýalarǵa berildi. Qalǵan kólemdi maýsymnyń sońyna deıin qamtamasyz etý josparlanyp otyr.

— Óńirde sý únemdeý tehnologııalary men ádisteri belsendi qoldanylýda. Segiz jańa sý qoımasyn salý josparda bar. Bir bóget salý jobasy daıyndaldy. Islam damý banki arqyly eki joba júzege asyrylady. Budan bólek, eki joba respýblıkalyq bıýdjetten jáne taǵy ekeýi jergilikti bıýdjetten qarjylandyrylady, —dep atap ótti Beıbit Isabaev. 

Eske sala keteıik, búgin Oljas Bektenov vegetatsııalyq kezeńde sý táýekelderin basqarý jónindegi óńirlik shtabtar qurýdy tapsyrǵan bolatyn. 

Al Sý resýrstary jáne ırrıgatsııa mınıstriligi Qazaqstanda shamamen 85 myń gektar jer sý únemdeý tehnologııasymen sýarylatynyn málimdedi.