Jetisý oblysynda ózenge qulap ketken er adamnyń denesi tabyldy

ALMATY. KAZINFORM – Jetisý oblysynda Kóksý ózeninen temir arqan arqyly ótpek bolyp, sýǵa qulap ketken adamnyń denesi tabyldy.

– 15 mamyrda Jetisý oblysy Kerbulaq aýdanynda, oqıǵa ornynan 15 shaqyrym jerden Tótenshe jaǵdaılar departamentiniń jedel-qutqarý jasaǵynyń qutqarýshylary er adamnyń denesin taýyp, sýdan alyp shyqty. Denesi polıtsııa qyzmetkerlerine tapsyryldy, sot-medıtsınalyq saraptama taǵaıyndaldy, – dep habarlady Jetisý oblysynyń baspasóz qyzmeti.

Vedomstvodan atap ótkendeı, izdestirý jumystary birneshe kúnge sozyldy. Oǵan 98 adam men 22 tehnıka jumyldyryldy. Onyń ishinde Tótenshe jaǵdaılar departamenti, áskerı polıtsııa, ishki ister departamenti, jergilikti atqarýshy organdar, orman sharýashylyǵy, áskerı bólimderdiń ókilderi jáne joǵalǵan azamattyń týystary bar.

Eske salaıyq, osyǵan deıin áleýmettik jelide Kóksý ózenniń ústinen temir arqan arqyly ótpek bolǵan er adamnyń sýǵa qulap, aǵys alyp ketken vıdeosy taraǵan bolatyn.