Jetisý eldi mekenderiniń 72%-y gazben qamtylady

ASTANA. KAZINFORM – Jetisý oblysynda ortalyq sý júıesimen qamtý 99,9%-ǵa jetti, gazdandyrý deńgeıi jyl sońyna deıin 72% bolady. Bul nátıjeni ákim Beıbit Isabaev eseptik kezdesýinde baıandady. 

Ákimniń sózinshe, Jetisý oblysy qurylǵansha tek 5 eldi meken ǵana gazdandyrylǵan bolatyn. Bıyl «Taldyqorǵan-Úsharal» magıstraldy gaz qubyrynyń qurylysy aıaqtaldy.

– Aqsý, Sarqan, Alakól aýdandarynyń shamamen 152 myńnan astam adamy bar 84 eldi mekendi tabıǵı gazben qamtý úshin jobalyq-smetalyq qujattamalar ázirlenip jatyr. Osy jobalardy iske asyryp, 2028 jyly óńirde 210 eldi mekenge gaz júrgizýdi josparlap otyrmyz. Oblysta gazǵa qajettilik artyp kele jatqandyqtan, jeke ınvestıtsııalar esebinen «Almaty-Taldyqorǵan» ekinshi magıstraldy gaz qubyrynyń jobalyq-smetalyq qujattamasy jasalyp jatyr, – dedi B.Isabaev Ortalyq kommýnıkatsııalar qyzmetinde ótken baspasóz máslıhatynda.

Óńir basshysy aýyz sýmen qamtý máselesine de toqtaldy. Onyń aıtýynsha, 2023-2024 jyldary ortalyqtandyrylǵan sýmen jabdyqtaýǵa 4 aýyl qosyldy, 25 eldi mekeninde aýyz sýdyń sapasy jaqsardy. Bıyl taǵy 4 eldi meken ortalyqtandyrylǵan sýmen qamtylady.

Jalpy, 329 eldi meken ortalyqtandyrylǵan sýmen jabdyqtalyp, qamtamasyz etý deńgeıi 99,9%-ǵa jetti.

Aıta keteıik, Jetisý oblysynda bıylǵy 10 aıda barlyq sala boıynsha ósim baıqalady. Óńirde 27 jańa óndiris ashylyp, myń jarym jumys orny quryldy.

«Qorǵas» arnaıy ekonomıkalyq aımaǵynda 32 joba iske asyrylyp, 2 myńnan astam jumys orny ashylǵan. Sondaı-aq jańadan Týrızm basqarmasy quryldy. Alakól jáne Balqash kólderiniń jaǵalaýyn kútip ustaý úshin eki kommýnaldyq mekeme quryldy.