Jetisý ákimi «Qapal-Arasan» shıpajaıynyń taǵdyry týraly aıtty

ASTANA. KAZINFORM – Jetisý oblysynyń ákimi Beıbit Isabaev «Qapal-Arasan» sanatorııiniń qashan ashylatynyn jóninde tilshiler suraǵyna jaýap berdi. 

Ákim shamamen 15 jyl buryn sanatorıı jeke menshikke berilgenin eske saldy. Endi shıpajaıdyń qaıta ashylýy jeke ınvestorǵa tikeleı baılanysty.

– Bul óte ózekti ári kúrdeli másele. Sanatorıı jeke kásipkerdiń qolyna ótken soń 2-3 jyl jumys istedi, keıin basqa kompanııalar tobyna satyldy. Olar da ári qaraı shıpajaıdy basqalarǵa satqan. Sońǵy ret sóıleskenimizde, ataýy naqty esimde joq, «Kaspıan» kompanııasy bolýy kerek, jobalyq-smetalyq qujattama daıyndap jatqanyn aıtty. 2027 jyly rekonstrýktsııany bastaımyz dep ýáde berdi. Ýáde berip jatyr, biraq shynymdy aıtsam, qurylys bastalaryna senimim az. Endi bári jeke ınvestorǵa baılanysty, — dep jaýap berdi ákim Ortalyq kommýnıkatsııalar qyzmetinde.

Spıker mundaǵy radon bulaqtary adam densaýlyǵyna óte paıdaly eken, sondyqtan “Qapal-Arasan” shıpajaıy biregeı nysan ekenin aıtýda.

Buǵan deıin Beıbit Isabaev Jetisý ýnıversıtetinde ıtalııalyq JOO fılıaly ashylǵanyn aıtqan edi. Ýnıversıteti dıplomy Italııada da, Qazaqstanda da moıyndalady.