Jetisý oblysynyń polıtseıleri «sıntetıka» satýshyny ustady

TALDYQORǴAN. QazAqparat - Jetisý oblysynyń polıtseıleri oblystyq prokýratýranyń úılestirýimen arnaıy operatsııa júrgizip, 51 jastaǵy «sıntetıka» satýshyny ustady, dep habarlaıdy QazAqparat.

ІІM málimetinshe, er adam budan buryn esirtki zattaryn saqtaý jáne satýmen baılanysty qylmysy úshin sottalǵan.

Qaratal aýdanynyń Eskeldi aýylynda ornalasqan jeke úıinde tártip saqshylary ósirilgen marıhýananyń 108 túp tamyryn tapty. Sondaı-aq daıyn keptirilgen 40 qarasora túpteri, esirtki oralǵan túıinshikter, onyń ishinde «sıntetıkalyq» esirtkiler jáne qoldanýǵa arnalǵan ártúrli quraldar tabyldy.

«Kúdikti ýaqytsha ustaý ızolıatoryna qamaldy. Tergeý amaldary, sıntetıkalyq esirtkini ótkizý jáne saqtaý, sondaı-aq quramynda esirtki bar ósimdikterdi ósirý, satý jáne saqtaýdy kózdeıtin, qylmystyq zańnamanyń eki baby boıynsha júrgizilip jatyr», - dedi Jetisý oblysy PD Esirtki qylmysyna qarsy is-qımyl basqarmasynyń bastyǵy Murat Jumabaev.