Jetisý oblysynda 20 myńnan astam adam turaqty jumyspen qamtyldy
Bul týraly Jetisý oblystyq jumyspen qamtýdy úılestirý jáne áleýmettik baǵdamlamalar basqarmasynan málim etti, dep habarlaıdy QazAqparat tilshisi.
Basqarma málimetinshe, jumysqa ornalasqan azamattardyń 74% Ulttyq jobalar jáne bos jumys oryndary sheńberinde, 24% jeke bastamalar, qalǵan 2%-y kásipkerlik bastamalary grant, mıkrokredıt sheńberinde jumysqa ornalasqan.
Qabyldanǵan sharalardyń nátıjesinde jyl basynan beri jumyssyzdyq deńgeıi 5,1%-dan 4,9%-ǵa deıin tómendedi.
«Ekonomıkalyq qyzmet túrlerine sáıkes jumyspen qamtylǵandardyń basym kópshiligi aýyl sharýashylyǵy, qurylys jáne óndiris, bilim, densaýlyq saqtaý jáne áleýmettik qyzmet kórsetý salalaryna ornalasty. Jumyspen qamtylǵan azamattardyń 60%-y osy negizi bes salaǵa tıesili», - dep habarlady basqarma ókilderi.
Basqarma tarapynan oblysta eńbek naryǵyndaǵy suranys pen usynys arasyndaǵy teńgerimsizdik máselesi zerdelenip, jumys berýshiler arasynda saýalnama júrgizilgen. Máselen, saýalnama nátıjesinde eńbek naryǵyna 992 tiginshi nemese kıimdi qalpyna keltirýshi (restavrator) mamandary qajet ekeni anyqtaldy, biraq atalǵan mamandyq boıynsha oblys kolledjderinde jylyna 120 maman (Alakól kópsalaly kolledji, Taldyqorǵan servıs jáne tehnologııalar kolledji, Aqsý agrotehnıkalyq kolledji) daıyndalyp shyǵarylady.
Jalpy, Jetisý oblysynda 2022-2023 oqý jylynyń barysynda óńirdiń bilim berý mekemelerine kolledj jáne JOO túlekteri qatarynan 308 jas maman jumysqa ornalasqan. Al aldaǵy jańa oqý jylynda jergilikti bıýdjet qarajaty esebinen bólingen bilim berý granttary aıasynda oqýyn aıaqtaıtyn 202 túlekti jumysqa ornalastyrý josparlanyp otyr.
Degenmen óńir mektepterine matematıka, orys tili men ádebıeti, fızıka, hımııa pániniń muǵalimderi áli de qajet. Pedagog kadrlarǵa qajettilik máselesin sheshý maqsatynda jergilikti bıýdjet qarajaty esebinen bilim berý granttary taǵaıyndalýda.
«Bıyl 2022-2023 oqý jylyn 6545 túlek aıaqtasa, sonyń 5170-i Ulttyq birińǵaı test tapsyrǵan. Túlekterge Jetisý oblysy ákiminiń 100 granty taǵaıyndaldy. Onyń 60-y áleýmettik áljýaz sanattan shyqqan túlekterge, 40-y jalpy konkýrs boıynsha bólinedi. Basymdyqqa ádettegideı bilim, medıtsına, aýyl sharýashylyǵy men tehnıkalyq mamandyqtar ıe», - dep habarlady oblystyq bilim basqarmasynan.
Budan bólek, tamyz aıynda halyqaralyq jastar kúnine oraı qaladaǵy «Jastar» saıabaǵynda eńbek jármeńkesi uıymdastyrylǵan bolatyn. Oǵan jıyrma mekemeniń ókili qatysyp, aqparattyq tehnologııalar menedjeri, aspaz, daıashy, qoǵamdyq qyzmetshi, satýshy, muǵalim, jáne psıholog syndy júzge jýyq bos jumys oryndaryn usyndy.
Al memlekettik mekeme qyzmetkerleri kelýshilerge «Dıplommen aýylǵa», «Jastar tájirbıesi», «Urpaqtar kelisim sharty» jobalar jaıly keńes berdi. «Eńbek» memlekettik baǵdarlamasy aıasynda oqytý jáne kásip ashý tetikterin de túsindirdi. Osylaısha jumys izdegen jastar mekemelerdiń tabaldyryǵyn tozdyrmaı-aq bir ortalyqtan mol maǵlumat aldy.
«Jyl basynan beri oblys aýmaǵynda 22 bos jumys orny jármeńkesi uıymdastyrylǵan. 187 azamat naqty turaqty jumysqa ornalasty. Áli jyl sońyna deıin elýge jýyq bos jumys oryn jármeńkesin uıymdastyramyz. Ol tek qana ashyq alańda uıymdastyrylmaıdy. Biz túrli formatty qoldanamyz. Sonyń ishinde onlaın formatynda ótkizemiz»,- deıdi «Jetisy jastary» KMM dırektorynyń orynbasary Erkebulan Aqbolatov.
Osy kúni 19 jas turaqty jumysqa qabyldandy. Solardyń biri, Aqjan Qanatbekova.
«Men ózim muǵalimmin. Búgin jármeńkege jumys izdep keldim. «Beıbı deı» degen ortalyqqa sóılestim. Erteń baryp rezıýmemdi ótkizemin. Jumysqa ornalastym. Osyndaı ıgi shara ótkizip otyrǵan uıymdastyrýshylarǵa alǵys bildiremin», – dedi qala turǵyny Aqjan Qanatbekova.
Eske salaıyq, Memleket basshysy Qasym-Jomart Toqaev elimizdiń áleýmettik-ekonomıkalyq damýy jónindegi keńeste halyqty, jastardy jumyspen qamtý – Úkimet úshin asa mańyzdy mindet ekenin basa aıtqan bolatyn.
