Jeti jylda Qazaqstannyń jalpy ishki ónimi eki ese ósti - Elbasy

ASTANA. Tamyzdyń 27-si. QazAqparat - Jańa XXI ǵasyrdyń alǵashqy jeti jyly ishinde ǵana Qazaqstan jalpy ishki ónimin eki eseleı aldy. Bul týraly Qazaqstan Respýblıkasy Konstıtýtsııasynyń 15 jyldyǵyna arnalǵan «Konstıtýtsııa - memlekettiń demokratııalyq damýynyń negizi» atty halyqaralyq ǵylymı-tájirıbelik konferentsııanyń ashylýynda Elbasy Nursultan Nazarbaev málim etti.

Prezıdent, Qazaqstannyń TMD elderi arasynda alǵashqy bolyp postkeńestik keńistikte balamasy joq salyq, zeınetkerlik reformalaryn júzege asyrǵanyn atap kórsetti. Ulttyq ekonomıkaǵa 100 mıllıard dollardan astam tikeleı shetel ınvestıtsııasy tartyldy.

«Tek jańa jıyrma birinshi ǵasyrdyń jeti jyly ishinde bizdiń ekonomıkamyz eki eselendi. Bunymen qosa, sońǵy on bes jylda jan basyna shaqqanda jalpy ishki ónim jeti júz dollardan segiz myń dollarǵa deıin, ıaǵnı on bir ese artty», - dep málim etti N.Nazarbaev óz sózinde.