Jetibaımunaıgaz kompanııasyna jerge munaı tókkeni úshin aıyppul salyndy
AQTAÝ. KAZINFORM — Bul týraly Ekologııa jáne tabıǵı resýrstar mınıstrliginiń Kazinform agenttigine bergen resmı jaýabynda aıtyldy. Quzyrly organ Jańaózen qalasy men Jetibaı aýyly aýmaǵyndaǵy munaı-gaz óndirisi oryndarynda ekologııalyq zańnamasynyń saqtalýyn teksergen.
Mınıstrliktiń málimetinshe, Mańǵystaý oblystyq ekologııa departamenti 2024-2025 jyldary jerdiń munaı ónimderimen lastaný deregi boıynsha «Mańǵystaýmunaıgaz» AQ «Jetibaımunaıgaz» óndiristik basqarmasyna qatysty 8 tekserý júrgizgen.
Onyń qorytyndysy boıynsha jerdi búldirý deregi rastalǵan.
— Zańbuzýshylyq úshin joǵaryda atalǵan kásiporynǵa Ákimshilik quqyq buzý týraly kodeksiniń 337-baby 4-bóligine sáıkes 29 536 000 teńge kóleminde aıyppul salynyp, remedıatsııa jáne qorshaǵan ortany qalpyna keltirý baǵdarlamalaryn ázirleý nusqamalary berildi. Aıyppul tolyǵymen óndirildi jáne berilgen nusqamalar belgilengen merzimde oryndaldy, — delingen habarlamada.
Ekologtar tekserý barysynda kemshiliktiń basym bóligi shtattan tys jaǵdaılarmen baılanysty bolǵanyn anyqtaǵan.
Atap aıtqanda, munaı óndirýshi uńǵymalardy burǵylaý jáne salý kezinde bolǵan apattyq jaǵdaılar, uzaq ýaqyt paıdalanylyp kele jatqan magıstraldyq qubyrlardyń korrozııaǵa ushyraýy.
Degenmen, departament qyzmetkerleri atalǵan kompanııanyń nusqamalardy jáne remedıatsııa is-sharalaryn ýaqytynda oryndaýyn baqylaǵan.
Buǵan deıin Mańǵystaýda munaı qaldyqtaryn tókken kompanııaǵa 60 mln teńge aıyppul salynǵanyn jazǵan bolatynbyz.