Jeti aıda JІÓ ósimi 6,3%-ǵa jetti — Úkimet
ASTANA. KAZINFORM — Úkimettiń baspasóz ortalyǵy alańynda ótken baspasóz konferentsııasynda Premer-mınıstrdiń orynbasary — ulttyq ekonomıka mınıstri Serik Jumanǵarın Memleket basshysynyń ekonomıkalyq ósim jónindegi tapsyrmasynyń oryndalý barysy týraly aıtty.
Ol Prezıdent Qasym-Jomart Toqaev 2029 jylǵa qaraı Qazaqstan ekonomıkasyn eki esege arttyrý jóninde órshil maqsat qoıyp otyrǵanyn atap ótti. 2024 jyldyń qorytyndysy boıynsha mundaǵy nysanaly kórsetkishke qol jetkizildi.
— Bul baǵyttaǵy jumystar jalǵasýda, sonyń ishinde ınvestıtsııany yntalandyrý, ónimdilikti arttyrý jáne ekonomıkanyń shıkizatqa jatpaıtyn sektoryn keńeıtý esebinen júrýde. Bıylǵy qańtar-shilde aılarynyń qorytyndysy boıynsha ekonomıkalyq ósim 6,3%-ǵa jetti. Naqty sektordaǵy ósim 8,3% qurady. Qyzmetter óndirisi 5,2%-ǵa ósti, — dep habarlady Serik Jumanǵarın.
Negizgi draıverler — kólik (+22,5%), qurylys (+18,5%) jáne saýda (+8,6%) salasy. Taý-ken ónerkásibinde ósý jalǵasyp (+8,5%), óńdeý sektory (+6,1%) jandana tústi.
Negizgi kapıtalǵa salynǵan ınvestıtsııa 16,1%-ǵa ósti
Ulttyq ekonomıka mınıstri Serik Jumanǵarın ekonomıkaǵa ınvestıtsııa tartý jónindegi jumystar týraly habarlady.
Vıtse-premer qabyldanǵan sharalar nátıjesinde qańtar-shilde aılarynyń qorytyndysy boıynsha negizgi kapıtalǵa salynǵan ınvestıtsııa 16,1%-ǵa óskenin atap ótti.
— Investıtsııanyń eń kóp ósimi bilim berý salasynda 2,3 ese, qarjy qyzmetinde 90,1%, óńdeý ónerkásibinde 38,7%, aýyl sharýashylyǵynda 27%, densaýlyq saqtaýda 17,5%, kólikte 17% mólsherinde baıqalady,— dep naqtylady Serik Jumanǵarın.
Ekonomıkany ártaraptandyrý: Óńdeý ónerkásibinde óndiris kólemi 6,1%-ǵa ósti
Serik Jumanǵarın Qazaqstanda ekonomıkany ártaraptandyrý boıynsha aýqymdy jumystar júrip jatqanyn atap ótti. Sonyń ishinde shıkizatty tereń óńdeý jáne aralas salalardy damytýǵa basa mán berilip otyr.
Qabyldanǵan sharalardyń nátıjesinde qańtar-shilde aılarynyń qorytyndysy boıynsha óńdeý ónerkásibinde óndiris kólemi 6,1% — ǵa ósti.
— Ósimge metall buıymdar óndirisi men mashına jasaýda 14%-ǵa, tamaq ónimderinde 9,2%-ǵa, munaı óńdeýde 8,6%-ǵa, hımııa ónerkásibi ónimderinde 6%-ǵa ulǵaıý esebinen qol jetkizildi,— dep habarlady Serik Jumanǵarın.
Taý-ken ónerkásibi de joǵary ósý qarqynyn saqtap keledi — +8,5%. Bul munaı óndirýdiń 11,9%-ǵa, gaz óndirýdiń 14,3%-ǵa jáne kómirdiń 10,6%-ǵa artýymen baılanysty.
Eske sala keteıik, buǵan deıin Úkimet bos bıýdjet qarajatyn bankterde ýaqytsha ornalastyrý qaǵıdasyn bekitkenin jazǵan edik.