Jerlesteri Jaqsylyq Úshkempirovty eske aldy
TARAZ. KAZINFORM — Jambyldyqtar Almaty qalasyndaǵy «Keńsaı» zıratyna baryp, danqty sportshy, birtýar tulǵa, Eńbek Eri Jaqsylyq Úshkempirovtiń rýhyna quran baǵyshtady. Rásimge marqumnyń jaqyn týystary da qatysty.
Budań soń qazaqtan shyqqan tuńǵysh Olımpıada jáne álem chempıony Jaqsylyq Úshkempirovtiń rýhyna as berildi.
Eske alý sharasyna Almaty oblysynyń ákimi Marat Sultanǵazıev, jambyldyq sport salasynyń ardagerleri men sheberleri, bapkerler, óner maıtalmandary jáne marqumnyń týǵan-týystary, birqatar zamandas dostary jınaldy.
Basqosýda aldymen Almaty oblysynyń ákimi Marat Sultanǵazıev sóz alyp, tulǵa týraly oramdy oılaryn ortaǵa saldy.
Sondaı-aq Jambyl oblysynyń ákimi Erbol Qarashókeev Eńbek Eri Jaqsylyq Úshkempirovtiń ónegeli ómirine, bıik bolmysy men parasat, adamgershilik qasıetterine toqtalyp, eleýli erligi men eńbegin basa aıtty.
Budan bólek, óńir basshysy danqty sportshynyń armanyn 44 jyldan keıin oryndap, Olımpıada chempıony atanǵan Eldos Smetovtiń de tarıhı jeńisin erekshe atap ótti.
Oblys ákimi Eldos Smetovti kútip alýǵa, syı-sııapat jasaýǵa atsalysqan birqatar demeýshiler men óner juldyzdaryn marapattap, alǵys aıtty.
Jambyl oblystyq ardagerler keńesiniń tóraǵasy Erkinbek Soltybaev, máslıhat tóraǵasy Abdaly Nuralıev, Jaqsylyq Ámiráliulynyń jubaıy Kúlpan Úshkempirova jáne aǵaıyn-týystary, óner juldyzdary, Parıj Olımpıadasynyń chempıony Eldos Smetov pen kúmis júldegeri Demeý Jadyraev sóz alyp, tulǵa týraly estelikterin bólisti.
Aq bata berilip, tulǵa rýhyna quran baǵyshtaldy.
