Jerge túkirgen Májilis depýtaty 15 myń teńge aıyppul tóleıtin boldy

ASTANA. QazAqparat – Májilis depýtaty Erlan Saırov qazaqstandyq telearnalardyń biriniń tikeleı efırinde sóılep turyp, jerge túkirgeni úshin 15 315 teńge kóleminde aıyppul tóleıtin boldy, dep habarlaıdy QazAqparat Polisia.kz-ke silteme jasap.

«Polıtsııa departamenti vıdeony zerttedi. Jalpy paıdalaný oryndaryn lastaý faktisi boıynsha osy azamatqa qatysty QR Ákimshilik quqyqbuzýshylyq kodeksiniń 434-2-baby 1-bóligimen ákimshilik is qozǵaldy.

5 AEK (1 AEK – 3063 teńge) mólsherinde aıyppul salyndy», - delingen Pavlodar oblysynyń Polıtsııa departamenti usynǵan málimette.

Aıta keteıik, Májilis depýtaty telearnanyń tikeleı efırine qosylyp, Ekibastuz qalasyndaǵy apatqa qatysty jaǵdaıdy jetkizý kezinde jerge túkirip jibergen.

Osy máselege qatysty E.Saırov áleýmettik jelidegi paraqshasynda túsinik bergen edi.

«Birinshiden, qaýymnan, eger qolaısyz jaǵdaıǵa qaldyrsam, keshirim suraımyn.

Ekinshiden, keshe keshke Ekibastuzda óte aıaz boldy, dalada turǵandyqtan osyndaı jaǵdaı boldy.

Dalada tórt-bes saǵat júrdik, TETs-qa bardyq, sol kezde tamaǵym qurǵap ketken bolýy kerek.

Biz qoǵam aldynda árbir qadamymyz úshin jaýap berip, azamattarǵa júris- turysymyzdy túsindirip otyrýymyz qajet dep esepteımin.

Taǵy da qolaısyzdyq úshin keshirim suraımyn!

Men el aldynda árqashan ashyq bolýǵa tyrysamyn», - dep jazdy depýtat.

Foto: t.me/POLICE_of_KZ