Jer zańnamasyn buzý derekteri: SQO-da 87 ýchaske anyqtaldy
ASTANA. KAZINFORM — Jyldyń basynan beri oblys prokýratýrasy nysanaly maqsaty boıynsha paıdalanylmaı jatqan jalpy aýdany 73 myń gektardan asatyn 87 jer ýchaskesin anyqtady. Bul týraly Soltústik Qazaqstan oblysy prokýratýrasy málim etti.
Aqjar, Jambyl, Ýálıhanov jáne Ǵ. Músirepov atyndaǵy aýdandarda jer paıdalanýshylar Qazaqstan RespýblıkasyJer kodeksiniń (budan ári — Kodeks) talaptaryn buza otyryp, aýyl sharýashylyǵy maqsatyndaǵy 86 ýchaskeniń tıisti deńgeıde paıdalanylýyn qamtamasyz etpegen.
— Petropavl qalasynda Kodeks talaptaryn buzý arqyly kásipkerlik sýbektisi uzaq ýaqyt boıy kommertsııalyq qyzmetke arnalǵan aýdany 12,5 ga jer ýchaskesin paıdalanbaǵan. Prokýrorlyq qadaǵalaý aktileri boıynsha kadastrlyq quny 362,9 mln teńge bolatyn, jalpy aýdany 4 447 gektar 7 jer ýchaskesi memleket menshigine qaıtaryldy, — delingen habarlamada.
Qalǵan jer ýchaskeleri boıynsha jumystar jalǵasady.
Memleket basshysynyń 2024 jylǵy 2 qyrkúıektegi Joldaýyna sáıkes, jergilikti atqarýshy organdar qaıtarylǵan jerlerdi adal jer paıdalanýshylarǵa berý boıynsha jumys júrgizýde.
Qadaǵalaý organy jer qatynastary salasyndaǵy zańdylyqty qamtamasyz etý jáne quqyq buzýshylyqtardyń aldyn alý boıynsha júıeli jumysty jalǵastyrady.
Buǵan deıin Aqtóbede 1,9 gektar paıdalanylmaǵan jer telimi memleket menshigine qaıtarylǵan bolatyn.