Jer qoınaýyn ıgerýshilerdiń qyzmeti ǵaryshtan baqylanady
Bul týraly Pavlodar oblysynyń halqymen kezdesýde Indýstrııa jáne ınfraqurylymdyq damý vıtse-mınıstri Dınara Şeglova aıtty.
Atalǵan kezdesýde óndirisi órkendegen óńir halqynyń vıtse-mınıstrge qoıǵan saýaly az bolǵan joq. Máselen, pavlodarlyqtardy jer qoınaýyn ıgerý salasyndaǵy beıberekettik alańdatyp otyr.
Oblys halqynyń aıtýynsha, «Jer qoınaýy jáne jer qoınaýyn paıdalaný týraly» Kodekste memlekettik baqylaý tártibi jetkilikti deńgeıde qarastyrylmaǵan.
«Qaǵaz júzindegi baqylaý tártibiniń saldarynan jer qoınaýyn ıgerýshiler aıyppul jáne basqa da ákimshilik jaýapkershilikten sytylyp keledi», deıdi jergilikti halyq.
Bul rette IIDM basshysynyń orynbasary joǵaryda atalǵan zań qaıta qaralyp jatqanyn jetkizip, ásirese jer qoınaýyn paıdalanýshylardyń qyzmetine qadaǵalaý júrgizýge ózgeris engizý kózdelip otyrǵanyn aıtty.
«Qoldanystaǵy kodekste qajetti aqparat qaǵaz júzinde usynylyp kelgendikten, ony qaıta qarstyrýǵa týra kelip otyr. Nege deseńiz, qazir bul baǵytta tsıfrly tehnologııalar engizilip, barlyq málimet qamtylǵan arnaıy portal iske qosylýy tıis. Sondaı-aq qadaǵalaý tártibine ózgerister engiziletin bolady. Aıtalyq, ǵaryshtyq monıtorıng jer qoınaýy ıgerý salasyna baqylaýdy kúsheıtýge septigin tıgizbek. Óıtkeni Shyǵys Qazaqstan oblysynda jer qoınaýyn paıdalanýshylardyń belgilengen aýmaqtan ary asyp, geologııalyq barlaýdan bólek jerdi ıgerýge kirisken jaǵdaılary baıqaldy. Qajetti derektermen QR IIDM-ni «Qazaqstan Ǵarysh Sapary» ulttyq kompanııasy qamtyp keledi. Biz olarǵa jer qoınaýyna geologııalyq barlaý júrgizýge jáne ıgerýge lıtsenzııasy bar barlyq kompanııanyń jáne belgilengen ýchaskeniń tizimin berdik. Soǵan sáıkes bizge tıisti aqparattar usynylady. Joǵaryda keltirilgendeı, elimizdiń shyǵysyndaǵy jaǵdaı boıynsha arnaıy komıssııa taǵaıyndalyp, tıisti tekserister júrgiziledi», – dedi D.Şeglova.
Osy oraıda Pavlodar oblysynda mashına qurastyrý, munaı-hımııa, taý-ken sektory syndy ónerkásip túrleri jolǵa qoıylǵanyn aıta ketý kerek. Bul óńirdegi kásiporyndar óndiristi zamanýı turǵyda, ásirese tsıfrly tehnologııalardyń negizinde damytýǵa basymdyq berip keledi. Osy arqyly óndiristik protsesti ońtaılandyryp, joǵary eńbek ónimdiligin arttyrýǵa jol ashylyp otyr. Aıtalyq, 2018 jyldan beri oblys aýmaǵynda shamamen 5 mlrd teńge somasyna 30-ǵa jýyq joba iske asyrylypty. Sonymen birge 2024 jyly taǵy da 3 jobany júzege asyrý josparlanǵan. Olar energııa únemdeý basqarmasynyń dıspetcherlik bólimshesin avtomattandyrýǵa, sondaı-aq kompıýterlik trenajermen qyzmetkerlerdi attestatsııalaýǵa daıyndyǵyn jetildirýge jáne t.b. baǵyttaǵy kórsetkishterdi jaqsartýǵa arnalǵan.
Budan basqa D.Şeglova pavlodarlyqtarǵa e-Qurylys tsıfrly júıesi arqyly elimizdegi qurylys salasyn jandandyryp, jumys tıimdiligin arttyrý josparlanǵanyn aıtyp berdi. Al, zııatkerlik kólik júıesi salynyp jatqan joldardy baqylaý men sapasyn jaqsartyp, júk tasymaldaý protsesin ońtaılandyrýǵa múmkindik beretinin jetkizdi.
Memleket basshysynyń «Ortalyq atqarýshy organdar basshylarynyń halyqpen kezdesýlerin ótkizý týraly» Jarlyǵyna sáıkes Indýstrııa jáne ınfraqurylymdyq damý mınıstrliginiń ókilderi elimizdiń óńirlerine baryp, jergilikti halyqpen kezdesýleri odan ári jalǵasatyn bolady.
