Jeńistiń 80 jyldyǵy aıasynda TMD elderiniń jýrnalısteri Mınskide bas qosty
MINSK. KAZINFORM – Belarýs Respýblıkasynyń Aqparat mınıstrligi men Syrtqy ister mınıstrligi TMD jáne EAEO elderiniń BAQ ókilderi arasynda baspasóz týryn uıymdastyrdy, dep habarlaıdy Kazinform menshikti tilshisi.
Bul is-shara Jeńistiń 80 jyldyǵyna arnaldy jáne aqparattyq yntymaqtastyqty nyǵaıtýǵa, tarıhı jadyny saqtaý maqsatyna baǵyttaldy.
Atalmysh týr Belarýs astanasy – Mınsk qalasymen tanysýdan bastaldy. Tilshiler Táýelsizdik alańy jáne basqa da mańyzdy kórnekti oryndardy aralady.
Baspasóz týryna qatysýshylarǵa erekshe áser etken nysan qazirgi Mınsktiń sımvolyna aınalǵan Ulttyq kitaphana boldy. Birneshe kún boıy qala kóshelerimen júrip ótken jýrnalıster onyń tazalyǵy men kórkine, tarıhı jáne zamanaýı sáýlet óneriniń úılesimdiligine biraýyzdan joǵary baǵasyn berdi.
Jýrnalıster Ekinshi dúnıejúzilik soǵysta qaza tapqandarǵa arnalǵan memorıaldyq keshenderge de bardy. Olardyń qatarynda 1943 jyly soǵys kezinde tolyǵymen joıylǵan Hatyn aýyly da bar. Bul memorıal beıbit turǵyndardyń ómirin jalmaǵan qasiretti eske salyp tur. Іs-sharaǵa qatysýshylar sondaı-aq Ekinshi dúnıejúizilik soǵys tarıhy mýzeıine taban tiredi.
Sonymen qatar jýrnalıster ónerkásiptik kásiporyndardy, tarıhı-mádenı mura obektilerin jáne ulttyq saıabaqtardy aralady. Press-týr TMD jáne EAEO elderiniń BAQ ókilderi arasynda tájirıbe almasý úshin mańyzdy alańǵa aınaldy. Bul Belarýs elin joǵary tehnologııaly negizi bar, tabıǵı baılyq áleýeti mol, qarqyndy damyp kele jatqan memleket retinde tanýǵa múmkindik berdi.
Sheteldik BAQ ókilderi mundaı is-sharalardyń tarıhı jadyny saqtaý, halyqtar arasyndaǵy dostyq pen ózara túsinistikti nyǵaıtýdaǵy mańyzyn erekshe atap ótti.
Uıymdastyrýshylar osyndaı baspasóz týryn turaqty túrde ótkizýge úmit bildirip, bul bastama aqparattyq yntymaqtastyqty damytýǵa jáne elder arasyndaǵy mádenı baılanystardy kúsheıtýge sep bolady dep senim bildirdi.