Jeńis Seıdýllauly: Ulttyq qundylyqtarymyzdy barynsha dáripteıtin dáýir týdy
«Óner salasyndaǵy eń mańyzdy baǵyttardyń biri - kıno. Búgingi tańda halyq sanasyn jańǵyrtýdyń nemese qalyptastyrýdyń basty ári eń tıimdi quralyna aınalǵan kıno salasynyń ózektiligi kún saıyn arta túsýde. Bul týraly Elbasy Nursultan Nazarbaev óziniń «Uly dalanyń jeti qyry» maqalasynda «Qazirgi zamandaǵy halyqtardyń tarıhı tanym-túısiginde kıno óneri erekshe oryn alady. Jalpy halyqtyń sanasynda fılmderdegi jarqyn kınoobrazdar irgeli ǵylymı monografııalardaǵy derekti portretterden góri mańyzdyraq ról atqarady» dep erekshe atap ótken bolatyn», - deıdi ol.
Jeńis Seıdýllaulynyń aıtýynsha, qazaq kınosynyń qazirgi damý jaǵdaıy jańasha bastamalarǵa toly kezeń. Sebebi onyń basty maqsaty - ótken tarıhymyzdy túgendeý, tarıhı sanany jańǵyrtýǵa áser etý, keleshektegi josparymyzdy aıqyndaý.
«Rýhanı jańǵyrý» baǵdarlamasy aıasyndaǵy ıgi bastamalardyń nátıjelerine zer salyp qarasaq, qazir ulttyq qundylyqtarymyzdy barynsha dáripteıtin dáýir týdy. Eń bastysy, máńgilik eldiń máńgilik murasy bolatyndaı ulttyń rýhyn kóteretin týyndylar jasalyp jatyr. Solardyń biri - kúni keshe tusaýkeseri ótken «Elbasy joly. Astana» fılmi. Qazaqstan Respýblıkasy Tuńǵysh Prezıdenti kúnine oraı rejısser Aqan Sataevtyń tartý etken kartınany tamashalaýǵa Memleket basshysy N.Á.Nazarbaevtyń ózi keldi. Táýelsiz Qazaqstan elordasynyń qalyptasý tarıhyndaǵy Elbasynyń róli týraly baıandalǵan fılmniń alǵashqy kórsetilimi «Qazaqstan» ortalyq kontsert zalynda ótti», - deıdi Jeńis Seıdýllauly.
Qazaqstannyń eńbek sińirgen qaıratkeri óz sózinde otandyq kıno salasyndaǵy mańyzdy oqıǵaǵa aınalǵan fılmniń «Qazaqkontsert» memlekettik kontserttik uıymy eńbek etetin óner oshaǵynda kórsetilýi ózi úshin úlken mártebe ekenin aıtady.
«Jazyq dalada ósip turǵan úlken ekzotıkalyq gúldiń obrazyndaǵy biregeı, teńdesi joq keshendi qurý ıdeıasyn Memleket basshysy usynǵan edi. 2009 jyly Elbasynyń bastamasymen ashylǵan elorda tórindegi «Qazaqstan» ortalyq kontsert zalynyń tehnıkalyq múmkindikteri «Elbasy joly. Astana» kórkem fılminen alǵan jaqsy áserdi eseleı tústi. Óner - ómirdiń aınasy demekshi, memleket tarıhyndaǵy eleýli oqıǵalardyń negizinde jasalǵan kórkem fılm sol kezdegi ómir shyndyǵyn anyq ári naqty kórsete bilgen. Kórermen qaýym zor yqylaspen qabyl alǵan bul týyndy eńseli elimizdiń Elordasyn jańadan quryp, barsha álemge pash etken Ult kóshbasshysynyń qıyn sátterde qabyldaǵan tarıhı sheshimderin baǵalaýǵa, tereń sezinýge yqpal etti», - dep túıdi Jeńis Seıdýllauly.
Eske sala ketsek, 30 qarasha kúni QR Prezıdenti Nursultan Nazarbaev elorda jurtshylyǵymen birge «Elbasy» kınoepopeıasynyń «Astana» atty fılmin tamashalaǵan bolatyn.