Jeńis Qasymbek 20 myń jumys ornyn qalaı ashatynyn aıtty

ASTANA. QazAqparat - Qazaqstan men Qytaıdyń birlesken jobalarynyń arqasynda 20 myń turaqty jumys orny ashylady. Bul týraly búgin «bir beldeý - bir jol» bastamasynyń 5 jyldyǵyna arnalǵan Qazaqstan-Qytaı bıznes forýmynda QR Investıtsııalar jáne damý mınıstri Jeńis Qasymbek aıtty, dep habarlaıdy QazAqparat tilshisi.

«5 jyldyń ishinde biz birqatar iri ınfraqurylymdyq jobalardy iske qostyq. Olar: Lıanıýngan porty, Qytaımen shekaradaǵy Qorǵas qurǵaq porty, Kaspıı teńizindegi Aqtaý porty,  Ortalyq Azııa elderin Parsy shyǵanaǵymen jáne Irannyń ońtústigindegi Bandar-Abbas portymen qosatyn, jalpy uzyndyǵy shamamen 900 shaqyrym «Qazaqstan-Túrikmenstan-Iran» jańa temirjol dálizi, bir bóligi Qazaqstan aýmaǵy arqyly ótetin «Batys Eýropa-Batys Qytaı» halyqaralyq tranzıt dálizi. Qabyldanǵan sharalar Qytaıdan Qazaqstan arqyly Eýropaǵa júkterdi 15 kúnge jetkizýge múmkindik beredi. Bul rette teńiz jolymen tasymal 2-2,5 jarys ese kóp ýaqyt alady», - dedi mınıstr.

Sonymen qatar ol ındýstrııalandyrý jáne ınvestıtsııa salasyndaǵy yntymaqtastyq aıasynda birlesken qazaqstandyq-qytaılyq jobalardy júzege asyrý belsendi júrgizilip jatqanyn aıtty. Oǵan jalpy somasy 27 mlrd dollardan asyp jyǵylatyn 51 joba kiredi.

«Biz osy jobalardyń esebinen shamamen 20 myń turaqty jumys ornyn qurýdy josparlap otyrmyz. Qazirdiń ózinde júzege asyrylǵan jobalar bar», - dedi Jeńis Qasymbek.
 

Máselen, mınıstrdiń dereginshe, Qostanaı oblysynda Djak markaly jeńil avtomobılderdi shyǵaratyn joba, Pavlodar oblysynda untaq polıpropılen óndirisi, Soltústik Qazaqstan oblysynda raps maıy óndirisi iske qosylǵan.