Jeńildetilgen avtonesıe: eki kúnde 2 549 mln teńgeniń ótinimi maquldandy

ASTANA. QazAqparat – «Ónerkásipti damytý qorynyń» baspasóz qyzmeti taratqan málimet boıynsha, 6 aqpannan beri avtomobılge beriletin jeńildetilgen nesıege 2 549 mln teńgeniń ótinimi maquldanǵan, dep habarlaıdy QazAqparat tilshisi.

«Bıylǵy 6 aqpanda Astana ýaqyty boıynsha saǵat 10.00-de «Ónerkásipti damytý qory» AQ autonesie.kz saıtynda «Jeńildikpen avtokredıtteý» baǵdarlamasy boıynsha ótinimderdi qabyldaý úshin pılottyq platformany iske qosty. Platformanyń alǵashqy iske qosylý qorytyndysy boıynsha pýlda 19 men 62 jas aralyǵyndaǵy 761 qatysýshy tirkeldi.

Platforma iske qosylǵannan beri autonesie.kz saıtyna kirýshilerdiń basym kópshiligi Almatyda – 31%, Astanada – 22,6% jáne Shymkentte – 9,3% baıqaldy. Platformany alǵash iske qosýǵa arnalǵan revolverlik qarajat kólemi – 7,6 mlrd teńge. Búgingi tańda avtosalondarǵa 463 qatysýshy júginip, tólem shottaryn aldy. Qatysýshylar arasynda eń tanymal avtomobıl brendteri – Hyundai jáne Chevrolet», - delingen málimette.

Óńirler boıynsha avtomobılge aqy tóleýge berilgen shottar:

● Astana – 175;

● Almaty – 79;

● Qostanaı obl. – 44;

● Jetisý obl. – 43;

● Shymkent – 41;

● Qaraǵandy obl. – 20;

● Shyǵys Qazaqstan obl. – 13;

● Aqtóbe obl. – 9;

● Soltústik Qazaqstan obl. – 7;

● Jambyl obl. – 6;

● Atyraý obl. – 5;

● Pavlodar obl. – 5;

● Aqmola obl. – 4;

● Abaı obl.- 4

● Mańǵystaý obl. – 3;

● Túrkistan obl.-3;

● Batys Qazaqstan obl. – 2;

Qazirgi tańda Baǵdarlamaǵa qatysýshy bankter («Eýrazııalyq bank» AQ, «Bank TsentrKredıt» AQ, «Qazaqstan Halyq Banki» AQ jáne «ForteBank» AQ) jalpy somasy 2 549 mln teńgege ótinimderdi qabyldady jáne maquldady. Platformada ótinim bergen sátten bastap, avtomobıl berilgenge deıin jeńildikpen kredıt resimdeýdiń jalpy merzimi kúntizbelik 60 kúnnen aspaıdy. Sondaı-aq, bir bank kepildik hat berýden bas tartqan jaǵdaıda, ótinish berýshiniń baǵdarlamaǵa qatysýshy basqa bankke júginýge quqyǵy bar ekenin atap ótken jón», - dep jazady qordyń baspasóz qyzmeti.

Buǵan deıin «Ónerkásipti damytý qory» AQ ókilderi alǵashqy lekke kirgen 761 ótinimniń keıbiri keri qaıtarylýy múmkin ekenin habarlaǵan edi.