Jenevadaǵy Ulttar saraıynda «Qazaqstan» zaly ashyldy
ASTANA.KAZINFORM - Qazaqstan Táýelsizdiginiń 34 jyldyǵy qarsańynda Jenevadaǵy BUU shtab-páterinde «Qazaqstan» zalynyń saltanatty ashylý rásimi ótti. Bul týraly Syrtqy ister mınıstrligi habarlady.
Іs-sharada Qazaqstannyń Dúnıejúzilik saýda uıymy jáne halyqaralyq ekonomıkalyq uıymdar janyndaǵy Turaqty ókili Qaırat Tórebaev, Jenevadaǵy BUU bólimshesiniń Bas dırektory Tatıana Valovaıa jáne Kóshi-qon jónindegi halyqaralyq uıym (KHU) Bas dırektorynyń orynbasary Ýgochı Denıels quttyqtaý sóz sóıledi. Qurmetti qonaq retinde tanymal qazaqstandyq ánshi, Qazaqstannyń Іzgi nıet elshisi jáne KHU-nyń Jahandyq izgi nıet elshisi Dımash Qudaıbergen qatysty.
Іs-sharaǵa dıplomatııalyq mıssııalardyń basshylary, halyqaralyq uıymdardyń ókilderi jáne qazaqstandyq dıaspora músheleri keldi.
– «Qazaqstan» zaly – bul jaı ǵana kezdesý orny emes, bul Qazaqstannyń kópjaqtylyqqa, dıalog pen beıbitshilikke degen adaldyǵynyń sımvoly. Biz onyń esigin búgin Dımashpen – álemdegi mıllıondaǵan adamdy biriktiretin daýyspen birge ashyp otyrǵanymyzǵa qýanyshtymyz, – dedi óz sózinde elshi Q.Tórebaev.
Rásim barysynda KHU Bas dırektordyń orynbasary Ýgochı Denıels D.Qudaıbergenniń KHU-nyń Jahandyq izgi nıet elshisi bolyp taǵaıyndalǵanyn resmı túrde jarııalady. Dımash sondaı-aq 2024 jyly iske qosylǵan attas ulttyq joba aıasyndaǵy alǵashqy Qazaqstan izgi nıet elshileriniń biri.
Qonaqtarǵa arnaǵan sózinde D.Qudaıbergen mýzykanyń aýdarmany qajet etpeıtin ámbebap til ekenin atap ótti. Ol qazaq ánderin úırenip, ulttyq aspaptardy ıgerip, Qazaqstanǵa kelip, onyń mádenıetin shynaıy tanyp júrgen Dears atty óz tyńdarmandary týraly erekshe jyly yqylaspen aıtty.Ártistiń aıtýynsha, bul oǵan beıbitshilik, meıirim jáne birlik týraly úndeýin jetkizýge shabyt beredi.
Qonaqtarǵa ánshiniń «Kıeli meken» beınerolıgi jáne onyń Іzgi nıet elshisi retindegi qyzmeti týraly KHU beınematerıaly kórsetildi. Іs-sharanyń sońynda qonaqtarǵa ulttyq taǵamdar usynyldy.
«Qazaqstan» zaly – Qazaqstannyń Birikken Ulttar Uıymyna jasaǵan erekshe syıy. 2013 jyly zaldy Jenevadaǵy BUU bólimshesiniń Bas dırektory Qasym-Jomart Toqaev ashqan.
Dekordyń negizgi elementteri – ulttyq oıý-órnek pen tarıhty beınelegen qolmen toqylǵan gobelender. Ulttar Saraıyn qaıta jóndeýden ótkizgennen keıin zal qaıtadan konferentsııalar, mádenı is-sharalar jáne kınolar kórsetý úshin Jeneva halyqaralyq qaýymdastyǵynyń ıgiligine berildi.
Buǵan deıin Jenevadaǵy Ulttar Saraıynda Abaıdyń bıýsti ashylǵanyn jazǵan edik.