Jenevada AQSh pen Iran arasyndaǵy kelissózder aıaqtaldy

ASTANA. KAZINFORM — Tegerannyń ıadrolyq baǵdarlamasyna arnalǵan kelissózderdiń úshinshi raýndy Jenevadaǵy Oman elshisiniń rezıdentsııasynda uıymdastyryldy jáne janama túrde ótti, dep habarlaıdy VVS.

Jenevadaǵy kelissózderge AQSh atynan Amerıka prezıdentiniń arnaıy ókilderi Stıv Ýıtkoff pen Djared Kýshner qatysty. Aldyńǵy raýndtar aıtarlyqtaı serpilis ákelmegen edi, degenmen Iran ókilderi belgili bir ilgerileý bar ekenin aıtqan. Qazirgi konsýltatsııalar qorytyndysy boıynsha da kelissózderge deldal bolyp otyrǵan Oman progress bar ekenin málimdedi.

«Biz AQSh pen Iran arasyndaǵy kelissózderde eleýli ilgerileýge qol jetkizip, kúndi aıaqtadyq», dedi Omannyń Syrtqy ister mınıstri Badr ál-Býsaıdı.

Onyń aıtýynsha, kelesi aptada Venada tehnıkalyq deńgeıdegi kelissózder ótedi.

Kelissózder janama túrde ótti jáne Jenevadaǵy Oman elshisiniń rezıdentsııasynda uıymdastyryldy. Olar birneshe saǵattyq úzilispen kúni boıy jalǵasty.

Kezdesý aıaqtalar aldynda Axios basylymynyń tilshisi Barak Ravıd derekkózge silteme jasap, Ýıtkoff pen Kýshnerdiń kelissózderdiń tańǵy sessııasynda ırandyqtardan estigen málimetterine kóńilderi tolmaǵanyn habarlady.

Eske sala keteıik, buǵan deıin AQSh pen Iran arasyndaǵy kelissózder bastalyp, úzilis jarııalan edi.