«Jemqorlyqqa joıqyn soqqy jetpeı tur» - baspasózge sholý
***
Prezıdent Nursultan Nazarbaevtyń álem tanyǵan, dúnıe qurmetine bólengen sanqyrly qyzmetiniń qymbat bir qyry - túrki tildes elderdiń arasyndaǵy dástúrli dostyq baılanystardy bekite, tereńdete túsýdegi eren eńbegi. Taıaý kúnderde Elbasymyz osy joldaǵy taǵy bir qadamyn jasamaqshy: 2 jeltoqsanǵa Memleket basshysynyń Túrikmenstanǵa resmı sapary josparlanǵan. Onyń aıasynda sol eldiń basshylarymen kelissózder ótedi. Sapar barysynda Elbasy Qazaqstan, Túrikmenstan jáne Iran aýmaǵy arqyly ótetin «Ózen-Bereket-Górgan» halyqaralyq temirjol magıstraliniń ashylýyna qatysady. «Egemen Qazaqstan» gazeti osy sapar qarsańynda Halyqaralyq Túrki akademııasynyń prezıdenti Darhan Qydyráliniń qazaq pen túrikmen halyqtarynyń tarıhı týystyǵy, eki eldiń táýelsizdik jyldaryndaǵy baılanystary týraly baıandaıtyn maqalasyn oqyrman nazaryna usyndy. Maqala «Jaqyn baýyrlastyqtan - jarqyn bolashaqqa» degen taqyryppen berilgen.
Keshe Ortalyq kommýnıkatsııalar qyzmetinde Ońtústik Qazaqstan oblysynyń ákimi Asqar Myrzahmetov baspasóz máslıhatyn ótkizdi. Onda óńirdiń áleýmettik-ekonomıkalyq damýy men memlekettik jáne salalyq baǵdarlamalardyń oryndalý barysy týraly áńgimelep, jýrnalısterdiń qoıǵan suraqtaryna jaýap berdi. Basylymnyń jazýynsha, óńirde osy jyldyń 10 aıynda 10 joba iske qosylǵan. Nátıjesinde, 6,8 mlrd. teńge ıgerilip, 654 jumys orny ashylǵan. Jyl sońyna deıin qalǵan 31 joba iske asyrylyp, jalpy 3 myńnan asa jumys oryndary qurylady eken. Indýstrııalandyrý kartasynyń jobalarymen bıylǵy jyldyń 10 aıynda 50 mlrd. teńgeniń ónimi shyǵarylǵan. Basylymnyń jazýynsha, brıfıng barysynda «Aq bulaq» baǵdarlamasy boıynsha atqarylyp jatqan jumystar men jiberilgen kemshilikter de jýrnalısterdiń nazarynan tys qalmady. Oblys basshysy bul suraqqa da tolymdy jaýap qaıtarǵan. «Esep komıteti anyqtaǵan kemshilikter boıynsha, 18 mlrd. teńge talan-tarajǵa tústi degen durys pikir emes. Bul - qarajat tekserý metodıkasy barysynda oryn alǵan qatelikter. Onyń ishindegi 12 mlrd. teńgesi qurylys merziminiń sozylǵandyǵynan bolǵan. Búgingi tańda ol jobalardyń barlyǵy jumys istep tur. Keıbiri 2-3 jyl¬dyń ornyna 4-5 jylda iske qosylsa da, búgingi tańda qyzmet etip jatyr. Al oryn alǵan kemshilikter boıynsha, sóz joq, biz tıisti sharalardy qabyldaıtyn bolamyz. Degenmen, kináni basqa bireýge arta salýdan aýlaqpyz. «Eger qandaı da bir joba óńirlerde iske asyrylyp jatsa, onda jergilikti atqarýshy organdar da tikeleı jaýapty bolady. Degenmen, obektıvtilik úshin aıta keteıik, jekelegen jobalardyń ákimshileri Sý komıteti bolyp tabylady. Sondyqtan, bıýdjettik bólýge baılanysty biz olardyń jumysyna aralasa almaımyz», - edi aımaq basshysy. *** «Aıqyn» gazetiniń senbilik sanynda Azamattyq alıanstyń Ekologııa komıtetiniń basshysy, «Jemqorlyqqa qarsy halyqtyq komıtet» qoǵamdyq qorynyń tóraǵasy Musaǵalı Dýambekovpen aradaǵy shaǵyn suhbat «Jemqorlyqqa joıqyn soqqy jetpeı tur» degen taqyryppen berildi. Basylym tilshisiniń saýaldaryna tuşymdy jaýap bergen ol: «Ásirese, jemqorlyq sot júıesin, quqyq qorǵaý organdaryn keń jaılamaǵany jón. Korrýptsııa týraly aıtqanda, keıde mektepterde ata-analardan bir-eki myń teńge jınalǵanyn nemese medıtsına qyzmetkerleriniń anyqtama qaǵaz úshin aqsha alǵanyn kóbirek áńgime etip ketemiz. Bul iste maıda-shúıde másele joq, olarmen de kúresý kerek, biraq naǵyz jaǵalasýymyz qajet alpaýyt jemqorlar basqa jerlerde. Olardan quqyq qorǵaý organdaryn, memlekettik kirister men shyǵystar saasyn, polıtsııa, prokýratýra, sot júıesin adalap shyqqanymyz jón. Osy qurylymdarda kúres óristetilip jatyr», - deıdi.
Keshe Astanadaǵy Táýelsizdik saraıynda Memlekettik hatshy Gúlshara Ábdiqalyqovanyń qatysýymen Qazaqstan halqy assambleıasy keńesiniń keńeıtilgen otyrysy ótti. Keńes jumysyna Parlament depýtattary, memlekettik organdardyń ókilderi, respýblıkalyq etnomádenı birlestikterdiń jetekshileri, assambleıanyń ǵylymı-saraptamalyq keńesiniń músheleri qatysty. Osy jıyn arqaý bolǵan maqala «Aıqyn» gazetinde «Táýelsizdik pen Tuńǵysh Prezıdent - tel uǵym» degen taqyryppen berildi. «Qazaqstannyń búgingideı jańa turpatty memleket retinde qalyptasýynda, ishki turaqtylyq pen halyqtyń birligin nyǵaıtýda Tuńǵysh Prezıdentimiz N.Nazarbaevtyń tarıhı róli ólsheýsiz. Elbasy eshbir memlekette bolmaǵan biregeı qoǵamdyq ınstıtýt - Qazaqstan halqy as-sambleıasyn quryp, etnosaralyq qatynastardy jetildirýde jemisti isterge jol ashty. Prezıdenttiń jaqynda halyqqa arnaǵan «Nurly jol» - bolashaqqa bastar jol» atty Joldaýynyń rýhanı tereńdigi jáne áleýmettik júgi de asa aýqymdy. Bul baǵytta Memleket basshysy 2015 jyly búkil halyq bolyp atap ótiletin aýqymdy is-sharalardy aıqyndap berdi», - dedi G.Ábdihalyqova jıyn barysynda. Sonymne qatar basylymnyń jazýynsha, óz sózinde Memlekettik hatshy Assambleıany ınstıtýtsıonaldyq nyǵaıtý boıynsha bıylǵy jyly atqarylǵan jumystardy qorytyndylap, Memleket basshysynyń «Qazaqstan halqy assambleıasynyń jyly» dep jarııalaǵan 2015 jyly memlekettik etnosaıasatty odan ári jetildirý jáne Qazaqstan halqynyń birligin nyǵaıtý jónindegi negizgi mindetterdi aıqyndap bergen.
