Jelide IPO týraly feık aqparat taraýda

NUR-SULTAN. QazAqparat - Áleýmettik jelilerde Qazaqstandaǵy «Halyqtyq IPO» baǵdarlamasynyń qatysýshylaryna kúnine 50 myń teńgeden jáne odan da kóp mólsherde tólem jasalatyndyǵy týraly aqparat tarady. Bul alaıaqtardyń isi. Bul týraly QazAqparat stopfake.kz saıtyna silteme jasap habarlaıdy.

Memleket basshysy 2021 jyldyń qańtarynda «Halyqtyq IPO» baǵdarlamasyn qaıta jańǵyrtýdy tapsyrǵany ras. Bul tapsyrmany «Samuryq-Qazyna» qory oryndaıdy. Alaıda onyń bul jarnamaǵa qatysy joq. Habarlandyrý «Lost Dog Street Band» dep atalatyn belgisiz akkaýnttan taraǵan.

Sońǵy ýaqytta osyndaı mazmundaǵy alaıaqtyq habarlamalar men habarlandyrýlar jıilep ketkenine nazar aýdaramyz. Eske sala keteıik, baǵdarlama týraly barlyq resmı aqparatty «Samuryq-Qazyna» resmı resýrstarynan alýǵa bolady.

«Samuryq-Qazyna» qory óziniń resmı Telegram-kanalynda adamdardy tartý úshin «Halyqtyq IPO» ataýyn paıdalanatyn alaıaqtardan qalaı qorǵaný kerektigi týraly eskertti.

– IPO-ǵa kásibı qatysýshylarda Qarjy naryǵyn retteý jáne damytý agenttiginen alǵan lıtsenzııa bolatynyna taǵy da nazarlaryńyzdy aýdaramyz. Muny Agenttiktiń resmı saıtynda tekserýge bolady. Sondaı-aq bırja músheleri lıtsenzıat bolyp tabylady, muny bırja saıtynda «Bırja músheleri» bóliminde tekserýge bolady. Sondaı-aq biz jáne basqa agenttikter shyn lıtsenzıattyń kim ekendigi týraly taratatyn ártúrli vıdeolardy qaraýyńyz kerek. IPO ornalastyrýdyń ózine keletin bolsaq, buryn habarlanǵandaı, aktsııalardy brokerler arqyly satyp alýǵa bolady, ol úshin Siz olardyń klıenti bolýyńyz kerek, olar sizge shot ashady nemese AIX «Tabys» qosymshasy arqyly jumys isteıdi», – delingen kanaldaǵy jarııalanymda.

«Halyqtyq IPO» baǵdarlamasynyń jumysy týraly tolyq aqparatty «Samuryq-Qazyna» qorynyń resmı YouTube-akkaýntynda jarııalanǵan vıdeodan da alýǵa bolady.
Sondaı-aq búgingi tańda baǵdarlama óz jumysyn áli bastamaǵanyn atap ótkenimiz jón.

Demek, Qaznette taralǵan jarnama feık bolyp tabylady. Ony alaıaqtar oılap taýyp, taratqan.