Jelide BJZQ qory atynan jalǵan aqparat taraýda

ALMATY. QazAqparat - «BJZQ» zeınetaqy qory atynan belgisiz tulǵalar telefon men elektrondyq poshta arqyly jalǵan aqparat taratyp jatyr. Qor syılyq utysy týraly habarlamaǵa azamattardyń aldanyp qalmaýyn eskertedi, dep habarlaıdy QazAqparat tilshisi.

«Belgisiz bireýler syılyqty alý úshin siltemede kórsetilgen ózge resýrstarǵa kirip, óziniń bank rekvızıtterin jiberýdi usynýda. Osylaısha, zeınetaqy qory salymshylarynyń jeke derekterin zańsyz ıelený áreketi jasalýda», - delingen qordyń baspasóz habarlamasynda.

Sondaı-aq, «BJZQ» AQ barlyq salymshylardy qor qandaı da bir utystar uıymdastyrýmen, jeke málimetterdi elektrondyq ádispen jınaýmen aınalyspaıtyny týraly jáne óz atynan mundaı is-áreket júrgizýge ózge tulǵalarǵa quzyret bermeıtinin eskertedi.

«Ózderińizdiń jeke málimetterińizdiń qupııalyǵyn qamtamasyz etý úshin mundaı elektrondyq habarlamalarǵa, telefon qońyraýlaryna, SMS-habarlamalarǵa jaýap bermeńizder jáne elektrondyq joldaýdaǵy siltemelerge kirmeńizder. Olar iri kompanııalardyń atyn jamylyp áreket etedi. Syılyqtar men utystar týraly ýádelerge senbeńizder. Bul týraly jaqyndaryńyz ben tanystaryńyzǵa eskertýdi umytpańyzdar. Mundaı qońyraýlar men joldaýlar týraly mindetti túrde BJZQ-nyń 1418 baılanys ortalyǵyna habarlańyzdar», - dep málim etti qordyń baspasóz qyzmetinen.