Jelide turǵyndardy balaǵattaǵan Şýche ákimi qyzmetinen ketti

Áleýmettik jelide turǵyndardy balaǵattap, synǵa ushyraǵan Şýche ákimi Oljas Nurmaǵambetov qyzmetinen ketti, dep habarlaıdy QazAqparat tilshisi. 

Oljas Nurmaǵambetovtyń Şýche qalasynyń ákimi laýazymynan qazannyń 2-de ketkeni belgili boldy. 

Ótinishti óz erkimen jazǵan. 

- Býrabaı aýdandyq aýmaqtyq saılaý komıssııasynyń 2 qazandaǵy sheshimi negizinde Býrabaı aýdany ákiminiń ókimimen Şýche qalasynyń ákimi Oljas Baıbolatuly Nurmaǵambetovtyń ókilettigi toqtatyldy, - delingen Býrabaı aýdany ákimdiginiń áleýmettik jelidegi akkaýntynda.

Sondaı-aq, Şýche qalasynyń burynǵy ákimi jelidegi óziniń jeke paraqshasynda qabyldanǵan sheshimdi túsindirgen jazba qaldyrdy.

- Men qala ákimi qyzmetinen ketý jóninde sheshim qabyldadym jáne bul sheshim men úshin óte qıyn boldy. Meniń densaýlyq jaǵdaıym 100 paıyz ónimdi jáne 24/7 rejıminde jumys isteýdi talap etetin osy jaýapty laýazymdy jalǵastyrýǵa múmkindik bermeıdi, - dep jazdy Oljas Nurmaǵambetov.

Sonymen birge, ol ákim laýazymynda bolǵan bir jyl ishinde aýdandyq mańyzy bar qalada kóptegen mańyzdy is atqarylǵanyn atap ótti.

- Komandamen jáne sizdermen birge aıtarlyqtaı nátıjege qol jetkizdik. Men sizderge, qala turǵyndaryna qyzmet etý múmkindigin bergenińiz úshin rızamyn. Bul keremet tájirıbe boldy jáne sizderdiń qoldaýyńyz ben senimińiz maǵan shabyt pen kúsh-qýat berdi, - dep túıindedi ol.

Aıta ketsek, budan buryn turǵyndardy jelide balaǵattaǵan Şýche ákimi Oljas Nurmaǵambetovtyń qatań sógis alǵanyn jazǵan edik.