Arqalyq túrmesinen tutqyndar qashqany týraly aqparat tarady - feık
Jelide Arqalyqtaǵy túzeý mekemesinen alty sottalýshy qashyp ketkeni týraly aqparat tarap jatyr. Qylmystyq atqarý júıesi departamenti bul aqparatty joqqa shyǵardy, dep habarlaıdy Kazinform.
Sýrette qylmyskerlerdiń túrmeden qashyp ketkeni týraly jazýy bar fotolary kórsetilgen.
- Olar qaýipti jáne qarýly. Eshqandaı shara qoldanbańyzdar, dereý 102 nómirine habarlasyńyzdar, - delingen habarlamada.
Qylmystyq-atqarý júıesi departamenti bul aqparatty joqqa shyǵardy.
- Qostanaı oblysy boıynsha qylmystyq-atqarý júıesi departamenti Arqalyqtaǵy túzeý mekemesinen qashyp ketken sottalǵandar týraly áleýmettik jelilerde taraǵan aqparattyń shyndyqqa janaspaıtynyn habarlaıdy. Esterińizge sala keteıik, jalǵan aqparat taratqany úshin qylmystyq jaýapkershilik qarastyrylǵan, - delingen vedomstvonyń habarlamasynda.
Bul aqparatqa Qostanaı oblysynyń polıtsııa departamenti de túsinik berdi.
- Bul fakti boıynsha QR QK 274-baby «Kórineý jalǵan aqparat taratý» boıynsha sotqa deıingi tergeý bastaldy. Osy baptyń sanktsııasy bir jylǵa deıin bas bostandyǵyn shekteý nemese sol merzimge bas bostandyǵynan aıyrý túrindegi eń joǵary jazany qarastyrady. Qazirgi ýaqytta «jalǵan» aqparat avtorynyń jeke basyn anyqtaý sharalary júrgizilýde, - dep habarlady vedomstvo.
