Jekemenshik klınıkalarda emdelý úshin ne isteý kerek

NUR-SULTAN. QazAqparat - Memlekettik tapsyrys sheńberinde kórsetiletin kepildendirilgen medıtsınalyq kómektiń birqataryn Qazaqstan azamattary tegin ala alady. Kepildendirilgen tegin medıtsınalyq kómek tizimine enetin qyzmetterdi tipti, jekemenshik klınıkalar da tegin kórsetedi.

Medıtsınalyq saqtandyrý qorynyń málimetinshe, sońǵy jyldary tapsyrysty oryndaıtyn emdeý mekemeleriniń arasynda jekemenshik klınıkalardyń sany birneshe ese artqan.

«Sebebi, sońǵy kezde memleket jeke klınıkalardyń da memlekettik tapsyrysqa qol jetkizýine barynsha jaǵdaı jasalyp otyr. Atap aıtqanda, úkimettiń arnaıy qaýlysymen jeke menshik salanyń memlekettik emhanalarmen qatar tapsyrys alýyna kedergi keltirip otyrǵan tosqaýyldar alynyp tastaldy. Sonyń nátıjesinde medıtsınalyq bıznestiń memlekettik tapsyrysty oryndaýǵa degen qulshynysy artty. Mysaly, qazir Medıtsınalyq saqtandyrý qorynan tapsyrys alatyn 1408 emdeý mekemesiniń 700-den astamy - jekemenshik. Bul 2017 jylmen salystyrǵanda eki ese kóp», - deıdi MSQ basqarýshy dırektory Zabıra Orazalıeva.

Alaıda, jekemenshik klınıkada tegin emdelýdiń de ózindik tártibi bar. Ol úshin siz sol klınıkaǵa tirkelgen bolýyńyz kerek. Endeshe, tirkelgen azamattar jekemenshik klınıkadan qandaı medıtsınalyq kómek túrlerin tegin ala alady? Olar mynandaı:

- Salalyq mamannyń qabyldaýy jáne keńesi;

- Kórsetilimder boıynsha emdeý, manıpýlıatsııalar men protsedýralar jasaý;

- Dárigerdiń joldamasy boıynsha kúndizgi statsıonarda emdelý;

- Kórsetilimder boıynsha, mamannyń joldamasymen zerthanalyq-dıagnostıkalyq qyzmet túrleri;

- Jalpy praktıka dárigeriniń, ýchaskelik terapevt pen pedıatrdyń qabyldaýy, konsýltatsııasy;

- Júkti áıelderdi baqylaý;

- Belgili bir nysanaly toptardy profılaktıkalyq maqsattaǵy medıtsınalyq tekserýler (skrınıng).

«Keı jaǵdaıda jekemenshik klınıkalar atalǵan kómekti tolyq kórsete almaýy múmkin. Ol klınıkanyń tehnıkalyq múmkindikterine baılanysty. Mundaı jaǵdaıda olar atalǵan qyzmetti qosymsha atqaratyn medıtsına uıymdaryna joldama berýi tıis», - delingen baspasóz baıanynda.

«Mańyzdy bir máseleni este saqtaǵan jón. Aıaq-astynan densaýlyǵy nasharlap, sozylmaly aýrýy asqynǵan patsıent ómirine qaýip tóngen jaǵdaıda shuǵyl medıtsınalyq kómek kez-kelgen medıtsına mekemesinde, tipi, jekemenshik klınıkada da tegin, keshiktirilmeı kórsetilýi tıis», - dedi Zabıra Orazalıeva.