Jekelegen taýar túrlerine eń tómengi baǵa deńgeıi belgilendi
ASTANA.KAZINFORM – Qarjy mınıstrliginiń Memlekettik kirister komıteti Eýrazııalyq ekonomıkalyq odaqqa (EAEO) múshe memleketterdiń aýmaǵynan ımporttalatyn jekelegen taýar túrlerine qatysty qoldanylatyn eń tómengi baǵa deńgeıiniń jańa mólsherin jarııalady.
Vedomstvo málimetinshe, atalǵan eń tómengi baǵa deńgeıi 2026 jylǵy 1 sáýirden 30 maýsymǵa deıin qoldanysta bolady.
– Komıtet EAEO elderinen ákelinetin jekelegen taýarlarǵa qatysty eń tómengi baǵa deńgeıi qoldanylatyn taýarlar tizbesin jáne olardyń mólsherin bekitti. Bul kórsetkishter ár toqsan saıyn jańartylyp otyrady, – delingen qujatta.
Sonymen qatar eń tómengi baǵa deńgeıin toqsan saıyn qaıta qaraý keıbir taýarlardyń baǵasyndaǵy maýsymdyq ózgeristerge jáne ımporttyq baǵalardyń qubylmalylyǵyna baılanysty júzege asyrylatyny atap ótilgen.
Oǵan qosa, EAEO-ǵa múshe memleketterdiń aýmaǵynan ımporttalatyn jekelegen taýarlarǵa qatysty eń tómengi baǵa deńgeıi qoldanylatyn taýarlar tizbesi men ony aıqyndaý qaǵıdalary Qarjy mınıstri mindetin atqarýshynyń 2025 jylǵy 31 qazandaǵy №658 buıryǵymen bekitilgen.
Aıta keteıik, Qarjy mınıstrligi «Baǵalardyń eń tómengi deńgeıi qoldanylatyn taýarlardyń jekelegen túrleriniń tizbesin, sondaı-aq baǵalardyń eń tómengi deńgeıin aıqyndaý qaǵıdalaryn bekitý týraly» buıryǵyna ózgeris engizý týraly buıryq jobasyn qoǵamdyq talqylaýǵa shyǵardy.
Sondaı-aq Qazaqstanda keıbir taýarlardy satyp alýda ulttyq rejımnen shyǵarý usynyldy.