Jeke tulǵalardyń bankrottyǵy jappaı sıpat ala qoımaıdy – ekonomıst

NUR-SULTAN. QazAqparat – Ekonomıst Andreı Chebotarev jeke tulǵalardyń bankrottyǵy týraly zańnyń qabyldanýy qarjy naryǵyna qalaı áser etetinini týraly boljamyn aıtty, dep habarlaıdy QazAqparat tilshisi.

«Halyqtyń ishinde bankrottyǵyn rásimdegisi keletinin aıtýshylar kóp. Shyn máninde olprotsedýra sonshalyq ońaı bolmaıdy. Ońaı bolmaǵany durys ta. Óıtkeni bankrottyq degen ońaı rásimdeı salatyn shara bolmaýy kerek. Bankrottyq –basqa amal qalmaǵan kezdegi aqyrǵy qadam. ıAǵnı, nesıeni tólegisi kelmeıtinder emes, shynymen de tóleı almaıtyndar bankrottyq rásimdeýi kerek. Sondyqtan halyq jappaı bankrottyq rásimdeıdi dep oılamaımyn»,- dedi sarapshy.

Aıtýynsha, zań qabyldanǵan keıin problemaly nesıeni bergen ekinshi deńgeıdegi bankter birshama shyǵyn kóredi.

«Óıtkeni buǵan deıin keshirilgen nesıeler bıýdjet esebinen ótelse, bul protseste olaı bolmaıdy. Alaıda bankrotqa tólenbeı ketkenine 5 jyldan asqan nesıeler jatady. Al ondaı nesıeniń basym bóligin esepten shyǵarylǵan. Meniń oıymsha, bul zańnyń qabyldanýy bankterdiń boryshkerlerge degen talabyn birshama qatańdatady. Bankrottyq rásimdegen boryshkerge keıin bankter tym talapshyl bolady. Onyń nesıe tóleý qabilettiligin muqııat qarap, jalpy nesıe ótinimderdi maquldaý kezinde barynsha saq bolady. Beretin nesıe somasyn da oılanyp baryp bekitedi. Biraq aýqymdy ózgeris bola qoımaıdy. Óıtkeni bankrottyq jappaı sıpat ala qoımaıtynyn joǵaryda aıttym. Ol protsestiń qıyn ótetinin kórgen talaı adamnyń qazirgi kóńili sý sepkendeı basylýy múmkin»,- dedi Andreı Chebotarev.

Eske salsaq, bankrottyq rásimdegen azamattar 5 jyl kóleminde bankter men mıkrokredıttik uıymdardan qaryz ala almaıdy.

Atalǵan zań jobasynda jeke tulǵanyń bankrottyǵyn rásimdeýdiń úsh joly usynylǵan.

Sondaı-aq boryshyn óteı almaǵany úshin sot arqyly bankrottyq rásimdegen azamattar árbir áreketin qarjylyq basqarýshylardyń nusqaýymen jasaıdy.