Jeke medıtsınalyq kitapshalar qazir onlaın rejıminde qoljetimdi
ASTANA.KAZINFORM - Bıylǵy 1 qańtardan bastap Qazaqstanda jeke medıtsınalyq kitapshalardyń (sanıtarııalyq kitapshalardyń) elektrondyq formaty engizildi. Bul týraly Densaýlyq saqtaý mınıstrligi habarlady.
Azamattar endi egov mobile mobıldik qosymshasyndaǵy «E-Densaulyk» servısi arqyly medıtsınalyq tekserý nátıjeleri men ózderiniń sanıtarııalyq kitapshasy týraly derekterdi ala alady, bul medıtsınalyq tekserýden ótý ýaqytyn edáýir qysqartady jáne terapevtke qaıta barý qajettiligin boldyrmaıdy. Sanıtarııalyq kitapsha daıyn bolǵan kezde azamattar 1414 nómirinen SMS-habarlama alady.
Jumys berýshiler úshin artyqshylyqtar
Jumys berýshiler qyzmetkerlerdiń medıtsınalyq kitapshalarynyń ózektiligin hr.enbek.kz tegin eńbek resýrstary portaly arqyly teksere alady, bul sanıtarııalyq normalardyń saqtalýyn baqylaýdy jeńildetedi jáne yqtımal qatelikterdiń aldyn alady.
Medıtsınalyq kitapshany kim alýǵa mindetti?
Elektrondyq júıe qoǵamdyq tamaqtandyrý, dárihanalar, sanatorııler qyzmetkerlerin, sondaı-aq qyzmet kórsetý qyzmetkerleri men medıtsına qyzmetkerlerin qosa alǵanda, qyzmetkerlerdiń 15 sanatyn qamtıdy. Bul sanattar úshin turaqty medıtsınalyq tekserýler jylyna bir ret nemese alty aıda bir ret ótkiziledi.
Jeke medıtsınalyq kitapshalardy elektrondyq formatqa kóshirý arqyly olardy tekserý protsesi azamattar men jumys berýshiler úshin ońaıyraq jáne jyldamyraq boldy.
Buryn habarlanǵandaı, azamattarǵa yńǵaıly bolý úshin medıtsınalyq kitapshalar men aýrýhana paraqtaryn qosa alǵanda, medıtsınalyq anyqtamalardyń 8 túri qaǵaz tasyǵyshtan elektrondyq formatqa aýystyrylady.
Buǵan deıin medıtsınalyq saqtandyrý týraly jańa zańda qandaı ózgerister bolatynyn jazǵanbyz.