Jedel járdem qyzmeti ákimdikterdiń quzyretine berilýi múmkin

ASTANA. KAZINFORM — Densaýlyq saqtaý mınıstri Aqmaral Álnazarova jedel járdem qyzmetin jergilikti atqarýshy organdardyń quzyretine berýdi usyndy.

— Jedel járdemge baılanysty problema joq emes, bar, osy oraıda kelesi jyly barlyq oblys jergilikti bıýdjet esebinen tıisti qarajat bólip, jedel járdem kóligi máselesin sheshýdi josparlap otyr. Bizde taǵy bir usynys bar, jedel járdem qyzmetiniń tıisti tarıfin belgilep, jergilikti atqarýshy organdarǵa berý máselesi qaralýda, — dedi Aqmaral Álnazarova Májiliste MÁMS júıesi týraly zań jobasyn tanystyrý barysynda Májilis depýtattarynyń saýalyna jaýap bere turyp.

Odan ári mınıstr jedel járdem qyzmetin óńir ákimdikteriniń quzyretine berýdiń sebebin atady. 

— Kólik, ınfraqurylym, avtokólikter turaǵy máselelerin sheshý, brıgadalardyń sanyn kóbeıtý jergilikti atqarýshy organdardyń quzyretinde bolýy kerek. Qarajat bólý, basqa da máseleler tez arada sheshiledi, — deıdi ol.

Buǵan deıin Aqmaral Álnazarova 2027 jyldan bastap jedel járdem qyzmeti boıynsha jańa norma engiziletinin málimdegen edi. 

Odan bólek Densaýlyq saqtaý mınıstri medıtsına salasyna ınvestıtsııa quıǵysy keletin kásipkerlerge jol ashyq ekenin jetkizdi. 

Aıta keteıik, búgin Májiliste «Mindetti áleýmettik medıtsınalyq saqtandyrý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy ótti.