Jedel járdem qaýipsizdigi: brıgadalarǵa jabdyqtar satyp alynady

ASTANA. KAZINFORM – QR Densaýlyq saqtaý mınıstrligi elimizde sanıtarııalyq avtokólikti GPS navıgatsııasymen jabdyqtaý 100 paıyzǵa jetkenin málim etti.

- Jedel medıtsınalyq járdem qyzmeti (JMJ) 20 derbes stantsııadan, 95 qalalyq qosalqy stantsııadan jáne 195 aýdandyq bólimsheden turady. Oblystyq ári qalalyq jedel medıtsınalyq járdem stantsııalarynda (JMJS) 1 524 kóshpeli brıgada jumys isteıdi, búginde JMJS teńgeriminde 2 437 sanıtarııalyq avtokólik bar, onyń ishinde qalada 1 540 jáne aýyldyq jerlerde 897 kólik qamtylǵan. Bıyl 70 sanıtarııalyq avtokólik satyp alyndy (jergilikti bıýdjet - 44, MJÁ - 1, Lızıng - 25), - delingen mınıstrliktiń Kazinform agenttigine bergen jaýabynda.

Vedomstvo aqparatyna qaraǵanda, aýdıo ári beınejazbamen jabdyqtaýdyń jalpy kórsetkishi 7,5 paıyzdy qurady (onyń ishinde: aýdıo - 2,8%, beıne - 4,8%). JMJ brıgadalarynyń aýdıojazbamen 100% jabdyqtalýy Aqmola jáne Qaraǵandy oblystarynda baıqalady. Sonymen qatar, aýdıojazba fýnktsııalarymen Jambyl oblysyndaǵy brıgadalardyń 11% jáne Ulytaý oblysyndaǵy brıgadalardyń 83% jaraqtandyrylǵan. Elimizdiń 2 óńiri beıne-fıksatorlarmen qamtylǵan: Jambyl oblysy 11% jáne Aqmola oblysy 43,5%. Budan basqa, dybys jáne beınejazbamen Soltústik Qazaqstan oblysy 100% jabdyqtalǵan. Aqmola, Aqtóbe, Qostanaı, Ulytaý oblystary men Shymkent qalasynda aýdıo jáne beınejazba qurylǵylaryn satyp alý josparlanyp otyr.

- 103 qyzmet pýltine kelip túsetin barlyq shaqyrýlar aqparattyq júıelerde tirkeledi. Respýblıka boıynsha shaqyrýlardy basqarýdyń avtomattandyrylǵan júıesimen jaraqtandyrý deńgeıi 100 paıyzdy qurady. Sanıtarııalyq avtokólikti GPS navıgatsııasymen jabdyqtaý 100 paıyzǵa jetti. Bıyldyń úsh aıynda medıtsınalyq jabdyqtarmen jaraqtandyrý qalada 98,8 paıyzdy, aýyldyq jerlerde 98,1 paıyzdy qurady, - dep atalyp ótken mınıstrlik habarlamasynda.

Eske salsaq, byltyr Densaýlyq saqtaý mınıstri Aqmaral Álnazarova jedel járdem qyzmetkerleriniń qaýipsizdigin qamtamasyz etý jospary jaıynda túsinik berdi. Sol kezde quqyq qorǵaý organdarynyń tájirıbesi negizinde olardy beıne jetondarmen qamtamasyz etý múmkindigi pysyqtalyp jatqany aıtyldy.

Aıta keteıik, byltyr kúzde Parlament Májilisinde sanıtarlyq kólikpen qamtamasyz etý problemasyna arnalǵan keńes ótti.