Jibek Qulambaeva Portýgalııadaǵy jarysty sátti bastady

ASTANA. KAZINFORM — Qazaqstandyq tennısshi, álemniń 332-raketkasy Jibek Qulambaeva Lozadaǵy (Portýgalııa) ITF W35 týrnırin sátti bastady. 

Atalmysh jarys eki apta qatarynan uıymdastyrylyp jatyr. Ótken aptada Jibek juptyq synda jeńimpaz atanǵan edi. Al jekeleı synda ekinshi aınalymda germanııalyq Katarına Hobgarskıge jol berdi. 

Bul joly qazaqstandyq tennısshi bastapqy kezdesýin dúnıejúzilik reıtıngide 494-orynda turǵan ıspanııalyq Krıstına Dıaz Adrovermen ótkizdi. Eki saǵattan astam ýaqytqa sozylǵan tartysty matchta Qulambaeva qarsylasynyń mysyn basa aldy – 6:1, 7:5.

Jibek Qulambaeva shırek fınalǵa shyǵý úshin álemniń – 274, osy dodanyń 7-raketkasy, aýstralııalyq Tına Smıtpen talasady. Ol reıtıngide 366-satydaǵy frantsııalyq Djýlı Belgraverdi jarys jolynan ońaı taıdyrdy – 6:1, 6:3. 

Eske sala keteıik, budan buryn Jibek Qulambaevanyń Portýgalııadaǵy jarystyń jeńimpazy atanǵanyn jazǵan bolatynbyz.