Jazýshy D.Dosjanǵa as berilip, qalamger jaıynda jazylǵan eki kitaptyń tusaýy kesildi
«Qanatty qalamger» atty kitap avtory Aqtóbe gýmanıtarlyq zertteýler ınstıtýtynyń dırektory Alpysbaı Musaev bolsa, ekinshi kitapty qalamgerdiń jary Sáýle Dosjan jazǵan, ol «Qudiretti qalam ıesi» dep atalady.
Qazaq jazýshylary arasynda D. Dosjannyń shyǵarmalary álemniń jıyrmadan astam tiline aýdarylyp, 7,7 mln danamen taralǵan. Sonyń nátıjesinde, elimizdegi eń oqyrmany kóp jazýshy atanǵan bolatyn. «Muhtar joly», «Abaı aınasy», «Alyptyń azaby», «Abaqty» sekildi derekti shyǵarmalary arqyly Dúkenbaı Dosjan tulǵataný baǵytynda da ózindik soqpaq qaldyrǵan edi. Táýelsiz elimizdiń rýhanı saıası ómirin, otanshyl sana men oǵan qarsy keletin keseldi kúshterdiń tartysy jaıly «Aq orda» romany arqyly keń kólemde dúnıe jarııalap úlgerdi.
Eń aıtýlysy, 1986 jylǵy jeltoqsan oqıǵasynyń salqyny ketpeı turyp jazǵan «Alań» romany jastardyń temirdeı tártipti talap etetin júıege qarsy kelgen tegeýrindi erligine elden buryn baǵa berip, jendetterdiń aıaýsyz qylmysyn áshkereleı alǵan qalamger boldy. «Barynsha aqkóńil, keńqoltyq azamat edi. Baıaǵy qazaqy minezdiń kóshinen túsip qalǵan jurnaq sekildi. Búgingi kúnniń qaqań-suqańymen de, ósek-aıańymen isi joq-tyn. Kisige jaqsylyq jasaýǵa beıim, japa shekse - kóbine adaldyqtan, ańqaýlyqtan japa shegetin. Jan balasyna jamandyq tilemeıtin. Eshkimge zalaly joq, shýaǵy mol. Bar biletini - jazǵan shyǵarmalary edi. Eńbekqor, kóp oqyp, kóp toqıtyn ǵulama-tyn», - deıdi qalamger jaıyndaǵy esteliginde Myrzataı Joldasbekov.