Jazýshy Ábish Kekilbaıulynyń 80 jyldyǵy halyqaralyq deńgeıde atalyp ótedi
Halyq jazýshysy Ábish Kekilbaıulynyń 80 jyldyǵyna arnalǵan sharalar 2019 jyly 10-12 qazan akúnderine josparlanǵan. Sharanyń maqsaty - jazýshy Á.Kekilbaıulyn halyqaralyq deńgeıde tanytyp, dáripteý.
10 qazanda bastalatyn sharaǵa jazýshymen áriptes bolǵan ádebıet jáne óner qaıratkerleri, shyǵarmalaryn birneshe tilge aýdarǵan aýdarmashylar, sondaı-aq Eýropa, Japonııa, Túrkııa memleketi men kórshiles Reseı elinen ǵalym, zertteýshiler shaqyrylady.
«Aıta ketý kerek sharaǵa QR Mádenıet jáne sport mınıstri qoldaý kórsetýde. Shara barysynda Aqtaý qalasynda Ábish atamyzǵa arnalǵan mádenı ortalyq kesheniniń aldynda ornalasatyn kórnekti eskertkishtiń jáne oblystyq ólketaný mýzeıiniń ashylý saltanaty, oǵan qosa mádenıet, óner qaıratkerleriniń halyqaralyq kongresi ótedi dep josparlanýda. Merekelik sharalar zańǵar jazýshynyń týǵan jeri Ońdyda jalǵasyn taýyp, keıin Shetpe kentinde respýblıkalyq deńgeıdegi «Sóz ben saz» baǵdarlamasymen tolyǵady. Sondaı-aq Halyqaralyq deńgeıdegi teatrlar qatysatyn «Ábish álemi» festıvali jáne qazaqtyń ulttyq sporttyq oıyndary da uıymdastyrylady dep josparlanýda», - dedi oblys ákiminiń orynbasary Qanybek Jumashev.
Mereıtoı aıasyndaǵy sharalar jyldyń basynda qolǵa alynǵan. Mektep oqýshylary arasyndaǵy «Ábish oqýlary», «Jas aqyndar músháırasy» sondaı-aq shyǵarma jazý saıystary ótkizildi. Qazirgi tańda sharanyń resmı logotıpi ázirlenip, daıyndyq qarqyndy júrgizilýde. Mańǵystaý oblysy ákiminiń tapsyrmasymen «Ábish oqýlarynyń» jeńimpazdaryna, fılıologııa jáne jýrnalıstıka salasynda jaqsy nátıje kórsetip júrgen stýdentterge Ábish Kekilbaev atyndaǵy shákirtaqy taǵaıyndalmaq.
Ábish Kekilbaıulynyń 80 jyldyǵyna oraılastyrylǵan sharalar legi tek qana Mańǵystaý oblysymen ǵana shektelmeı, 6 jeltoqsan kúni Nur-Sultan qalasynda jalǵasady.
