Jazda qandaı sý tutyný kerek - dáriger keńesi

ASTANA. KAZINFORM — Aptap ystyqta shóldi basý úshin eń tıimdi sýsyn – kádimgi taza sý. Jambyl oblysynyń sanıtarııalyq-epıdemıologııalyq baqylaý departamenti basshysynyń orynbasary Saltanat Álibaeva shildeniń shilińgirinde aǵzany durys ylǵaldandyrýdyń mańyzyna toqtaldy. 

Ol gazdalǵan jáne qantty sýsyndardan bas tartýǵa keńes berdi.

Mamannyń aıtýynsha, kún ystyqta bólme temperatýrasyndaǵy qarapaıym sý nemese tabıǵı jemis sýsyny, kompot ishken durys.

Al shaı ishetin bolsańyz, ony da sýytyp ishken jón.

«Gazdalǵan, tátti sýsyndar men energetıkterdiń aǵzaǵa paıdasynan góri zııany kóp. Olar shóldi ýaqytsha ǵana basady da, keıinnen qaıta shóldetip, asqazanǵa aýyrlyq túsiredi», – dedi Saltanat Qordabaıqyzy.

Sondaı-aq ol shildedegi aptapta sýdy jetkilikti mólsherde tutyný qajet ekenin atap ótti.

Dárigerlerdiń aıtýynsha, adam aǵzasyna táýligine 1 kg salmaqqa shamamen 30 ml sý qajet. Bul – eresek adam úshin kúnine 1,5 lıtrden 2–3 lıtrge deıin suıyqtyq ishý kerek degen sóz.

Maman ystyq kúnderi as mázirin de jeńildetýge shaqyrady.

«Ash júrýge bolmaıdy. Eń durysy – ár 2–3 saǵat saıyn az-azdan tamaqtaný. Aýyr, qýyrylǵan taǵamdardan góri kókónis, jemis pen salqyndatylǵan sorpaǵa basymdyq bergen abzal», – dep keńes berdi Saltanat Álibaeva.

Aıta keteıik, kúnine 7000 qadam júrýdiń densaýlyqqa paıdasy dáleldendi.