Jazataıym oqıǵalar dınamıkasy tómendeý tendentsııasyna ıe emes - kásipodaqtar federatsııasy
Búgin, 28 sáýir kúni Dúnıejúzilik eńbekti qorǵaý kúni aıasynda Kásipodaqtar federatsııasy «Qaýipsiz jumys orny – ómir men densaýlyqty saqtaýdyń negizi» atty dóńgelek ústel uıymdastyrdy. Onyń jumysyna respýblıkanyń ártúrli salalary men aımaqtarynyń kásipodaq kóshbasshylary men tehnıkalyq ınspektorlary, jumys berýshiler men ýákiletti memlekettik organdardyń ókilderi qatysty.
«Jazataıym oqıǵalar dınamıkasy is júzinde tómendeý tendentsııasyna ıe emes. Osy ýaqytqa deıin toptyq, adam qazasyna alyp kelgen apatty jaǵdaılardyń paıda bolýynyń qaıǵyly faktilerine kýá bolyp júrmiz. Kásipodaqtar federatsııasy Úkimet pen Parlamentke qaýipsizdik jáne eńbekti qorǵaý máseleleri boıynsha zańnamaǵa ózgerister men tolyqtyrýlar engizý týraly birqatar usynys engizýge bastamashy boldy. Aıta keterligi, olardyń birqatary Qazaqstan Respýblıkasyndaǵy 2030 jylǵa deıingi Qaýipsiz eńbek tujyrymdamasynda kórinis tapty», - dedi Kásipodaqtar federatsııasy tóraǵasynyń orynbasary Nurlan Óteshev.
Elimizde 2021 jylmen salystyrǵanda jazataıym oqıǵalar sany 1 297-den 1 232-ge nemese 5%-ǵa, jaraqat alǵandar 1 467-den 1 465-ke nemese 0,1%-ǵa azaısa, qaza bolǵandar sany 200-den 203 adamǵa nemese 1,5%-ǵa ósken.
«Sonymen qatar, tirkelgen 1 232 jazataıym oqıǵanyń 428-i kásipodaqtar jumys isteıtin 228 kásiporynda bolǵanyn aıta ketý kerek. Bul kásipodaq bar kásiporyndardaǵy jaraqat deńgeıiniń tómendigin kórsetedi. Óıtkeni, óndiristik keńester men eńbekti qorǵaý jónindegi tehnıkalyq ınspektorlar negizinen kásipodaqtardyń bastamasymen qurylady jáne jumys isteıdi», - deıdi QRKF ÁEQ jáne ÁÁ komıtetiniń bólim jetekshisi Marat Imash.
Ol osy ýaqytqa deıin federatsııanyń áleýmettik áriptesterge joldaǵan birqatar usynysyn aıtty. Olardyń ishinde – eńbekti qorǵaý jónindegi tehnıkalyq ınspektorlardyń mártebesi men ókilettikterin arttyrý, olardyń jumysyn materıaldyq jáne moraldyq yntalandyrý; jazataıym oqıǵany tergep-tekserý kezinde qyzmetkerdiń kinásiniń dárejesin alyp tastaý; Eńbek kodeksine áleýmettik áriptestik kelisimine jáne/nemese ujymdyq shartqa mindetti ereje retinde engize otyryp, barlyq jumys berýshiler úshin mindetti túrde óndiristik keńester qurý jáne olardyń ókilettikterin keńeıtý týraly normany engizý; «memlekettik eńbek ınspektory – eńbekti qorǵaý jónindegi tehnıkalyq ınspektor» formaty boıynsha birlesken tekserýlerdi uıymdastyrý; áleýmettik áriptestik qujattarynda qaıtys bolǵan qyzmetkerdiń otbasyna 10 jyldyq jalaqy mólsherinde birjolǵy tólem týraly usynystardy bekitý; áleýmettik áriptestik jáne áleýmettik-eńbek qatynastaryn retteý jónindegi respýblıkalyq, salalyq jáne óńirlik úshjaqty komıssııalardyń otyrystarynda qaýipsiz eńbek jaǵdaılaryn qamtamasyz etý máselelerin qaraý jáne t.b.
Óndiristegi jazataıym oqıǵalardyń negizgi sebepteriniń qatarynda jumystyń qanaǵattanarlyqsyz uıymdastyrylýyn, jábirlenýshiniń salǵyrttyǵyn, qaýipsizdik jáne eńbekti qorǵaý erejeleriniń buzylýyn, jumys oryndarynda tehnıkalyq jaǵdaıdyń osaldyǵyn atap ótti.
Sondaı-aq, Marat Imash áleýmettik áriptesterge «Vision Zero», «Halyqtyq baqylaý», «ASPANS» zamanaýı qaýipsizdik baǵdarlamalaryn júzege asyrýǵa qosylýdy usyndy.
Aıta ketsek, QR Kásipodaqtar federatsııasy 2023 jyldy «Qaýipsiz eńbek jyly» dep jarııalaǵan.
Buǵan deıin Eńbek jáne halyqty áleýmettik qorǵaý mınıstrligi málim etkendeı, Qazaqstanda jyl saıyn kásiporyndarda 1500-den astam jazataıym oqıǵaǵa jol beriledi, onyń 200-ge jýyǵy ólimmen aıaqtalady.
