Jaıyq ózeninde sý deńgeıi kóterilýi múmkin

ASTANA. QazAqparat – Naýryzdyń sońynda Jaıyq ózeni sýynyń deńgeıi 450 sm-ge deıin kóterilýi múmkin. Bul týraly QR TJM Tótenshe jaǵdaılardyń allyn alý departamenti Tehnogendi sıpattaǵy tótenshe jaǵdaılardyń aldyn alý basqarmasy bastyǵy Rollan Esmaǵanbetov málim etti, dep habarlaıdy QazAqparat tilshisi.

«Búginde Jaıyq ózenine Reseı tarapynan kólemdi sý keledi dep kútilýde. Ol naýryzdyń aıaǵynda bolady dep boljanyp otyr. Qazir Jaıyq ózeniniń muzy erip jatyr. Jergilikti kishigirim ózenderdiń tasýynan Oral qalasynda Jaıyq sýynyń deńgeıi 472 sm-ge deıin kóterildi. Biraq qazir 408 sm ıaǵnı qalypty deńgeıge tústi. Irıklınskoe sý qoımasynyń jaǵdaıyna kúndelikti monıtorıng júrgizip jatyrmyz. Onda 2 mln 180 tekshe metr sý bar. Sýdyń deńgeıi qalypty. Odan bólek, Bashqurtstannan keletin Sakmara ózeni sýynyń deńgeıin de qadaǵalap otyrmyz»,- dedi Rollan Esmaǵanbetov Ortalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, ózenderdiń sý deńgeıi jaǵdaıyna monıtorıng turaqty jasalýda. Sol sııaqty qajetti qural-jabdyq daıyn.

«Jaıyq ózeni sýynyń kóterilýi naýryzdyń aıaǵyna boljanýda. Qazir 408 sm bolsa, qaýipti jaǵdaıda 450 sm-ge barady dep otyr. Sondaı-aq, Reseı tarapynan ózen muzynyń erý protsesi bastalǵan joq», - deıdi ol.

Buǵan deıin mınıstrlik ókili elimizdegi sý tasqynynyń týyndaý sebepterin atap ótken edi.

Sondaı-aq, brıfıng barysynda 200-den astam eldi mekendi sý basý qaýpiniń seıilgeni aıtyldy.