«Jaıyq-Oral» ekspedıtsııasy Han ordasy aýylynda boldy
Orynbor oblysynan bastalyp, Jaıyq ózeni boıymen qaıyqtarmen júzip ótetin tarıhı-mádenı jáne ekologııalyq ekspedıtsııanyń sapary bıyl osymen erekshelendi. Bul dástúrli joryqtyń túpki maqsaty Jaıyq ózenin keleshek urpaq úshin saqtaý bolatyn. Osy oraıda ótken jyly Astana qalasynda eki eldiń basshylary «Jaıyq transshekaralyq ózeni basseıniniń ekojúıesin saqtaý jónindegi» kelisimsharttyń jobasyna qol qoıǵan edi. Bıylǵy 18 shildede QR Úkimetiniń «Jaıyq ózeni basseıniniń ekojúıesin qorǵaý jónindegi kelisimdi bekitý týraly» qaýlysy qabyldandy. Mundaı sharalar aımaqaralyq deńgeıde jalǵasyn taýyp, Orynbor jáne Batys Qazaqstan oblystary basshylarynyń bastamasymen arnaıy «Jaıyq kúni» belgilenip, jýyrda Orynbordaǵy Elek qalasyndaǵy Jaıyq jaǵasynda arnaıy belgi ornatyldy. Dostyqty tý etip kótergen ekspedıtsııanyń bıylǵy sapary uzaryp, Han ordasyna aıaq basqan Orynbor oblystyq mádenıet jáne syrtqy ister mınıstrligi halyqaralyq yntymaqtastyq basqarmasy basshysynyń orynbasary Sergeı Kýznetsov «Jaıyq kúniniń» endi jyl saıyn atalyp ótiletindigin jetkizdi. Óıtkeni Jaıyq ortaq, sondyqtan másele de ortaq.
Atalmysh ekojoryqtyń basshysy, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa tóraǵasynyń orynbasary Elena Tarasenko aýqymdy ekspedıtsııanyń Elbasynyń «Týǵan jer» baǵdarlamasymen úndesetinin, onyń Han ordasyndaı kıeli mekende túıindelýinde erekshe mán jatqandyǵyn, qos memleket arasyndaǵy ejelgi dostyq qarym-qatynasty keıingi urpaqqa nasıhattaýdyń bir joly osy ekendigin atap ótti.
Bókeı ordasy aýdandyq «Orda juldyzy» gazetiniń tilshisi Raýshan Baqytovanyń málim etkenindeı, qurmetti meımandar qatarynda QR Parlamenti Senatynyń depýtaty, qazaqtyń tuńǵysh general qyzy Sáýle Aıtpaeva, QR Ortalyq saılaý komıssııasynyń múshesi Lázzat Súleımen, Orynbor qalasy basshysynyń orynbasary Anton Shývakın, batysqazaqstandyq ólketanýshy, toqsan jastaǵy Jaısań Aqbaı jáne basqalar boldy. Olar Han zıratyna aıaldap, babalar zıratyna taǵzym etti. Osynda jerlengen Jáńgir han men onyń jary, Orynbor múftıiniń qyzy Fatıma hansha, Orynbor kadet korpýsynyń túlegi, qazaqtyń tuńǵysh ǵalymdarynyń biri Muhamed-Salyq Babajanov, ataqty kúıshi Dáýletkereı týraly málimetterge qanyqty. Orda topyraǵynda medıtsına salasynda qyzmet etip, aýrý sebepterin anyqtaý kezinde mert bolǵan dárigerler Nıkolaı Shabalın, Aleksandr, Olga Mıhaılovtardyń beıitinde, basqa da tarıhı oryndarda boldy. Bókeı ordasy tarıhı-mýzeılik kesheniniń bes mýzeıin tamashalaǵan qonaqtar dóńgelek ústel basynda pikir almasty. Ózderin jyly qarsy alǵany úshin aýdan basshylyǵy men mýzeı ákimshiligine rızashylyqtaryn bildirip, estelik syılyqtaryn usyndy.
«Jazıraly keń dalamen júrip kelip, qum Narynnyń shetinde ornalasqan, aınalasyn qaraǵaıly orman qorshaǵan Han ordasyna jetýdiń ózi bir ǵanıbet eken. Bizdi bul ólkeniń tarıhy da tánti etti», - dedi Orynbor qalasynyń turǵyny, Reseıdiń eńbek sińirgen saıahatshysy, belgili ǵalym, jetpis tórt jasar Aleksandr Fesenko.
