«Jaısań» shekara beketinde áli de 70-100 kólik tur

AQTÓBE. KAZINFORM — «Jaısań» shekara beketindegi jol qurylysy ýaqytsha toqtatylyp, júrgizýshiler elektrondy talon alýǵa mashyqtandy. Degenmen shekarada áli de 70-100 kólik bar. 

Aqtóbedegi «Jaısań» shekara beketinde buǵan deıin 500-600 kólikke deıin turyp qalsa, búginde onyń sany 70-100-ge túsken. Shekaranyń ótkizý problemasyn kótergen júrgizýshiler men kásipkerler máselesi áli de baqylaýda bolýy tıis. Sebebi bir kúnderi munda jumys qalypty bolsa, ekinshi kúni jaǵdaı ózgerip, adamdar kezegin uzaq kútip qalýy múmkin.

— Qarjy mınıstrligi Memlekettik kirister komıtetiniń buıryǵymen 19 mamyrdan bastap «CarGoRuqsat» baǵdarlamasy qoldanysqa engizildi. Bul Qazaqstannan Reseıge ótetin júk kólikterine arnalǵan elektrondy talon júıesi. «CarGoRuqsat» iske qosylǵannan beri shynynda da júrgizýshilerden shaǵym kóp tústi. Buǵan deıin de habarlaǵanymyzdaı, ortaq chatta eki kúnde 200 kásipker shaǵym túsirdi. Sonymen birge 100 júk tasymaldaýshy óz renishin bildirdi. Kepteliske túrtki bolǵan problemanyń biri jol bolsa, qazir bul baǵyt ashyldy. Al kezek sonda da bar. Búginde kezekte 140 kólik tur. Olar sheteldik jáne otandyq júk tasymaldaýshylar. Bul ózimizdiń tasymaldaýshylarǵa da keri áserin tıgizip tur. Búgin 13 maýsym bolsa, elektrondy kezekte bir aptaǵa deıin bos oryn joq. Aldyn ala satyp alǵan talondy. Olardyń ishinde osy qyzmetti kórsetetin saqtandyrý kompanııalary da bar. Taǵy bir aıta ketetin jaıt, máselen talondy 16 maýsymǵa aldy. Al olar búgin kelip, shekaradan óte alady. Qazir memlekettik kirister departamenti, eksporttyq baqylaý, shekarashylar tez jiberýge kúsh salady. Sebebi qazir júk arasynda buzylatyn zattar bar, — dedi «Atameken» oblystyq kásipkerler palatasy dırektorynyń orynbasary Rýslan Kúıshinov.

Kásipkerler palatasy buǵan deıin aıtylǵan usynystardyń qalaı oryndalǵanyn únemi baqylaýda ustamaq. Palata júıege tirkelgen jáne tirkelmegen kólikterdiń aǵynyn bólý qajet ekenin aıtty. Sonymen birge Mártók aýdanynyń ákimdigine jáne oblystyq memlekettik kirister departamentine júk kólikteri úshin arnaıy jınalmaly turaq salý múmkindigin qarastyrý usynyldy. 

Al Aqtóbe oblystyq memlekettik kirister departamenti «CarGoRuqsat» baǵdarlamasy turaqty jumys istep turǵanyn, eshqandaı irkilis bolmaǵanyn aıtty. Shekarada 4 maman jumys istep otyr. Ekeýi ımportqa, ekeýi eskportqa jaýapty. Salyq mamany qujatty skanerleıdi. Qujatta shekaradan alyp ótýge bolmaıtyn taýar aty jazylsa, tekseredi. Al qalǵan ýaqytta 2 mınýt saıyn bir júrgizýshige qyzmet kórsete alady.

— 19 maýsymda júıe iske qosylǵanda qıyndyq bolǵany ras. Tipti 500 kólikke deıin keptelis boldy. Ol kezde negizgi problema — jol jóndeý jumysy. Ákimdik, prokýratýra, Antıkor kelip qarap, bekettiń ishinde esh másele anyqtalmady. Bekettegi bar jumys shekarashylardyń mindetine kiredi. Al oblystyq memlekettik kirister departamentiniń 4 qyzmetkeri qujatty skanerlep alady, rastaıdy. Bary sol ǵana. Qazir jaǵdaı qalypqa tústi. Búginde 70-80 kólik bar, — dedi oblystyq memlekettik kirister departamenti basshysynyń orynbasary Baýyrjan Kamaladdınov.

Onyń aıtýynsha, shekaradaǵy jaǵdaı eki elge baılaýly. Birindegi jaǵdaı ekinshisine birden áser etedi. Sonymen birge jazda jemis-jıdek pisip, tasymal artyp otyr. Jyldaǵy jaǵdaı osy.

— Talon almasa, elektrondy kezekke turmasa kólik shekaradan ótpeıdi. Kezekti jol josparyna saı kúni buryn onlaın ala alady. Eger júrgizýshi bir kún keshigip qalsa, qaıta talon alýy kerek. Onyń quny — 1 AEK. Alǵashqy kezde keshikkender boldy, elektrondy talon ala almaı qınaldy. Sebebi olar ekinshi deńgeıli bank arqyly tólem jasaýy tıis. Qazir bári ýaqytynda ótip jatyr. «CarGoRuqsat» júıesi bolsa jumysyn ári qaraı jalǵastyra beredi, — dedi Baýyrjan Kamaladdınov.

Keptelistegi taǵy bir problema — eki shekara aralyǵyndaǵy oryn. Bul shekarada kezek kútip turǵan júrgizýshilerge arnalatyn turaq. Turaqta demalys, tamaqtaný orny bolsa, shaǵym joıylady. Ázirge Mártók aýdany ákimdigi 7 gektar jer bóldi. Endi onyń jolyn salyp, talapqa saı ınfraqurylym júrgizý kerek. Taǵy bir eskere ketetin jaıt, Aqtóbeden Reseıge ótetin 8 jolaq bar. Tórteýi shekaradan ótkizýge, tórteýi qabyldaýǵa arnalǵan. Al Reseı tarapyndaǵy jol eki jolaqty ǵana. Munyń da kepteliske áseri bar.

Aıta keteıik, Jaısań shekara beketi táýligine 300-350 kólikti ótkize alady.

Eske salsaq, mamyr aıynyń sońynda oblystyq kásipkerler palatasyna bir aptada 200-den astam shaǵym túsken. Shekaradan ótetin júrgizýshilerdiń máselesin sheshý úshin jıyn ótti.  Sybaılas jemqorlyqqa qarsy qyzmettiń Aqtóbe oblysy boıynsha departamenti kóshpeli monıtorıng ótkizdi.