Jaıly mektepterde 100% otandyq jıhaz qoldanylady

ASTANA. QazAqparat – «Jaıly mektep» jobasy aıasynda salynatyn mektepterdiń jızahy tolyqtaı otandyq ónim bolady. Bul týraly Oqý-aǵartý vıtse-mınıstri Edil Ospan málim etti, dep habarlaıdy QazAqparat tilshisi.

«Jaıly mektepterdi salý boıynsha jıhazdarǵa qoıylatyn talaptar «Atameken» ulttyq kásipkerler palatasy jáne Qazaqstannyń jıhaz qaýymdastyǵy ókilderimen birlesip kelisilgen. Atalǵan ulttyq joba aıasynda búkil jaıly mektep ergonomıka talaptaryna saı jabdyqtalady. Bul jerde qaýipsizdik máselesi de nazarǵa alynady. Jaıly mektepterdiń atyna zaty saı bolýyn qamtý maqsatynda mınıstrlik janynan arnaıy jumys toby quryldy. Onyń quramyna Densaýlyq saqtaý mınıstrligi, Indýstrııa jáne ınfraqurylymdyq damý mınıstrligi, «Atameken» UKP jáne jıhaz qaýymdastyǵy ókilderi bar», - dedi Edil Ospan ortalyq kommýnıkatsııalar qyzmeti alańynda ótken baspasóz máslıhatynda.

Vıtse-mınıstrdiń málimdeýinshe, atalǵan jumys toby jaıly mektepterdi jabdyqtaý jáne jıhazben qamtý boıynsha biryńǵaı talaptar ázirledi.

«Búginde talaptar jaıly mektepter salýǵa jaýapty operator «Samuryq-Qazyna» ulttyq kompanııasyna jiberildi. Aıta ketý kerek, mektep jıhazdary 100% otandyq ónim bolady. Sondaı-aq, mektep jıhazdary otandyq taýar óndirýshilerdiń tiziliminde tirkelgen jeke jáne zańdy tulǵalardan satyp alynady», - deıdi mınıstrdiń orynbasary.