«Jaıly mektep» jobasy: Aýylda da, qalada da birdeı standartpen 400 mektep salynady
Joba úsh aýysymdy jáne apatty mektepter men oqýshy oryndarynyń tapshylyǵyn joıýǵa baǵyttalǵan.
«Tek qana sońǵy 10 jylda oqýshylar sany 1 mln-ǵa ósip, búgingi kúni 3,7 mln-ǵa jetti. Bul óte jaqsy kórsetkish jáne bilim ınfrastrýktýrasyna belgili salmaq túsirip otyr, onymen qosa ýrbanızatsııa, ishki-kósh-qon, iri qalalarda tyǵyz shoǵyrlaný máseleleri de bar. Osy máselelerdi sheshý úshin 2023-2025 jyldar aralyǵynda eki aýysymda 842 myń oqýshy ornyna shaqtalǵan 401 mektep salýǵa respýblıkalyq bıýdjetten 2,6 trln teńge qarastyryldy», - dedi Sholpan Qarınova mınıstrliktiń keńeıtilgen otyrysynda.
Jobany ázirleý barysynda osyǵan deıin mektepterdi salý kezinde oryn alǵan problemalar eskerildi. Olar – salynǵan mektepterde pán kabınetteriniń jáne qajetti oqý-jabdyqtarynyń jetkilikti bolmaýy, konkýrstyq rásimderdiń uzaqtyǵy, jáne basqalary.
Qazirgi salynatyn mektepterdiń ereksheligi – aýylda da, qalada da birdeı standart boıynsha salynady.
«Jaıly mektepterdiń mynadaı erekshelikteri bar: bastaýysh jáne joǵary synyp oqýshylary mektep ǵımaratynyń jekelegen bloktarynda oqıdy. Sáıkesinshe, olardyń óz oqý kabınetteri, ájethanalary, sportzaldary bolady. Balalardyń qaýpsizdigin qamtamasyz etýge jaǵdaı jasalady. Beınebaqylaý, dybystyq dabyl sııaqty qaýipsizdik nysandary ornatylady. Oqýshylarǵa yńǵaıly bolý úshin oqý quraldaryn, aýystyratyn kıimderin saqtaıtyn jeke shkaftar, kitap oqýyna, demalýyna, shyǵarmashylyq áleýetin damytýǵa tıisti jaǵdaılar qarastyrylǵan», - deıdi birinshi vıtse-mınıstr.
Sonymen birge, mektep zamanaýı fızıka, hımııa, bıologııa, robototehnıka sııaqty kabınettermen qamtylady. Balalardyń shyǵarmashylyq qabiletterin arttyrýǵa, eńbekke baýlýǵa baǵyttalǵan jumystarǵa qolaıly orta jasalady. Arnaıy bilimdi qajet etetin balar úshin qajetti jaǵdaı jasalady.
Osyǵan deıin mektepte kóbinese bir sportzal qarastyrylǵan. Al jaıly mektepterde balalardyń jas ereksheligine baılanysty birneshe sportzal qarastyrylaǵan.
Mekteptiń sáýlet-josparlaýy jaıly, jaǵymdy, ár oqýshyǵa jáne muǵalimge laıyqtalyp ázirlenedi. Qurylys kezinde ashyqtyq qamtamasyz etiledi. Kez kelgen turǵyn ınteraktıvti karta arqyly qurylystyń barysymen, mekteptiń tıisti qujattarymen tanysa alady.
«Salynatyn mektepterdi pedagogtermen qamtamasyz etý – basty máselelerdiń biri. Mektep ómirinde tıisti deńgeıdegi basqarý, dırektordyń róli de erekshe ekeni málim. Sondyqtan dırektor menedjment jáne kóshbasshylyq baǵyttary boıynsha, muǵalimder óz pánderi boıynsha, oqytýdyń belsendi ádisteri boıynsha arnaıy kýrstardan ótedi. Bul sharalar oqýshylarǵa jańa qolaıly jaǵdaılarmen qatar sapaly bilimge qol jetkizýge múmkindik beredi. Jaıly mektep aıasynda ashylǵan mektepterge Y.Altynsarın atyndaǵy ulttyq akademııa tarapynan júıeli ádistemelik qoldaý jasalyp, oqýshylardyń oqý jetistikterin syrttaı baǵalaý arqyly bilim sapasyn ólsheý jáne arttyrý jumystary qolǵa alynady. Árıne, óńirlerdiń basqa mektepterimen de bilim sapasyn arttyrý boıynsha tıisti jumystar júrgiziledi», - dedi Sholpan Qarınova.
