«Jaıly mektepterdiń» eń basty erekshelikteri qandaı
ASTANA. KAZINFORM – Oqý-aǵartý mınıstri Ǵanı Beısembaev «Jaıly mektepterdiń» eń basty erekshelikterin atady.
— Ulttyq joba balalardyń turǵylyqty jerine qaramastan, zaman talabyna saı jaǵdaıda sapaly bilim alý múmkindigin qamtamasyz etýge baǵyttalǵan. Jaıly mektepterdiń jartysyna jýyǵy aýyldyq eldi mekenderde salynyp otyr. Osylaısha, 200 myńnan astam aýyl balasyn zaman talabyna saı jaıly bilim berý ortasymen qamtamasyz etý josparlanǵan. Jaıly mektepterdiń basty artyqshylyǵy — onda oqýshylarǵa qolaıly, ergonomıkalyq bilim berý keńistiginiń jasalýy. Bul mektepterdiń kólemi tıptik jobalarǵa qaraǵanda 15-20 paıyzǵa úlken, al tehnıkalyq jaraqtanýy jaǵynan 4 esege artyq, — dedi mınıstr Ortalyq kommýnıkatsııalar qyzmetindege brıfıngte.
Sonymen qatar onyń aıtýynsha, mektepterde robototehnıka kabınetteri, STEM-zerthanalar, horeografııa zaldary, kovorkıng aımaqtary, 4 sport zaly bar. Zamanaýı pándik kabınetter, alǵashqy áskerı daıyndyq úshin arnaıy ashyq alańdar qarastyrylǵan. Barlyq mektep zamanaýı jıhazdarmen jáne oqý qural-jabdyqtarymen jabdyqtalyp, árbir oqý kabıneti úshin qajetti tehnıkalyq quraldar jıyntyǵy qamtamasyz etilgen. Bunyń barlyǵy ustazdardyń jumysyn jeńildetip, oqýshylardyń bilim sapasyn kóterýge múmkindik beredi.
— Ulttyq joba aıasynda salynǵan mektepterde qaýipsizdik júıeleri kúsheıtilgen. Mektepter zamanaýı beınebaqylaý jáne ǵımaratqa kirip-shyqqandardy qadaǵalaý júıelerimen qamtamasyz etilgen. Bastaýysh jáne joǵary synyptar bólek-bólek bloktarda oqıdy. Munyń barlyǵy balanyń qaýipsiz ári jaıly ortada bilim alýyna baǵyttalǵan. Ulttyq joba aıasynda jergilikti óndiristi qoldaýǵa erekshe basymdyq berildi. Bul baǵytta mektep qurylysyna qajetti materıaldar, mektep jıhazdary tek otandyq taýar óndirýshilerden satyp alynady, — dedi Ǵanı Beısembaev.
Mınıstrdiń aıtýynsha, qarym-qabiletine qaramastan, kez-kelgen balaǵa jaǵdaı jasalǵan. Onyń ishinde erekshe bilim berý qajettilikteri bar balalar úshin de jeke sanıtarııalyq bólmeler, keń kabınetter, jedelsaty, pandýstar, arnaıy belgiler, psıholog, logoped jáne defektolog kabınetteri qarastyrylǵan.
— Muǵalimder ınteraktıvti tehnologııalar men pándik zerthanalardy qoldana otyryp, ár oqýshynyń qyzyǵýshylyǵy men qabiletine qaraı tulǵalyq damýyna jol ashady. Bilim berý protsesinde Prezıdent belgilegen «Adal azamat» tujyrymdamasynyń negizinde oqýshylardy ádildikke, eńbekqorlyqqa jáne adamgershilikke baýlıtyn qundylyqtar júıesi qalyptasqan. Mekteptegi bilim berý úderisi tek oqytý emes, ómirge beıimdeý, jaýapkershilik sezimin oıatý jáne qoǵamdyq sanany damytýǵa baǵyttalǵan. Bul mektepterde balalardyń boıynda ekologııalyq mádenıetti qalyptastyrý, qorshaǵan ortany qorǵaý, resýrstardy únemdi paıdalaný sııaqty jaýapkershilikti seziný daǵdylaryn damytýǵa erekshe mán berilýde. Osy qaǵıdalar Memleket basshysynyń «Taza Qazaqstan» ıdeıasyn balalarǵa mektep qabyrǵasynan bastap sińirýdi kózdeıdi, — dedi ol.