Jaıyqtyń deńgeıi 9,5 metrge deıin kóterilýi múmkin – TJM

ASTANA. KAZINFORM – Batys Qazaqstan oblysy Tótenshe jaǵdaılar departamentiniń resmı ókili Nurjan Tóleýish  óńirdegi ahýal kúrdeli ekenin aıtty.

«Qazirgi tańda jaǵdaı kúrdeli. Óıtkeni Jaıyqtyń sý deńgeıi áli kóterilip jatyr. «Qazgıdromettiń» baıandaýynsha, qazirgi deńgeıi 8 metr 62 santımetrge jetken. Jalpy qaýipti deńgeı – 8 metr 50 santımetr. ıAǵnı, qaýipti deńgeıden 12 santımetr asyp otyr», - dedi ol ortalyq kommýnıkatsııalar qyzmetinde ótken brıfıngide.

Onyń sózinshe, 25-26 sáýir kúnderi jaǵdaı ýshyǵa túsýi múmkin.

«Bizdiń oblys boıynsha qaýiptiń beti áli de qaıtqan joq. Sý deńgeıi áli de kóteriledi degen boljam bar. Oral qalasynyń tusynda Jaıyq deńgeıi 25-26 sáýirde 9,5 metrge barýy múmkin», - dedi Nurjan Tóleýish.