Jaıyqta sý deńgeıi kóterilip, Esilde tómendep keledi

ASTANA. KAZINFORM – Batys Qazaqstan oblysynda Jaıyq ózeninde sý deńgeıiniń kóterilýi saqtalýda. Bul týraly TJM ókili Asqar Shárip aıtty. 

«Batys Qazaqstan oblysynda Jaıyq ózeninde sý deńgeıiniń kóterilýi saqtalýda. Qapshyqtar tóseý, qorǵaý beketterin salý jáne sý basqan aımaqtarda sý aıdaý júrgizilip jatyr. Aldyn ala evakýatsııalanǵan turǵyndar evakýatsııalyq pýnktter men týystarynyń úıilerinde. Sonymen qatar janýarlar da qutqarylýda. Óńirde barlyǵy 1,2 mln-nan astam qapshyq 22 myń tonna ınertti materıal tóseldi», - dedi ol Ortalyq kommýnıkatsııalar qyzmetindegi brıfıngte.

Onyń aıtýynsha, Atyraý oblysynda 1 apta ishinde Jyloı aýdanynyń Qulsary qalasynda jyljymaly sorǵy stansa kómegimen 86 myń tekshe metrden astam sý soryldy.

«Qazirgi ýaqytta Soltústik Qazaqstan oblysynda úılerdi sý basý oqıǵasy tirkelgen joq. Esil ózeni sýy deńgeıiniń tómendeýi baıqalady. Osy ýaqytta 24 496 adam úılerine oraldy. 8 850 adam, onyń ishinde 3 840 bala evaktsatsııalyq pýnktterge jaıǵasqan. 4 680 turǵyn úı jáne 2 774 aýla aýmaǵynda sý baǵyty burylyp, sý soryldy. 11,5 mln tekshe metrden astam erigen qar sý soryp shyǵaryldy. 5,3 mln qapshyq jáne 1,5 mln tonnadan astam ınertti materıal tóseldi», - dedi Asqar Shárip.