Jaıyqta muzdyń tyǵyz massasy 20 jyldan beri bolmaǵan – «Atyraý oblysy Sý Arnasy» ókili

Atyraý qalasynyń keıbir shaǵyn aýdandary men oǵan irgeles ornalasqan eldi mekender keshe túnnen beri sýsyz otyr. Sýmen qamtý mekemesiniń ókili buǵan Jaıyq ózeninde 20 jyldan beri kezdespegen muzdyń tyǵyz massasy sebep bolǵanyn aıtty, dep habarlaıdy Kazinform.

«Atyraý oblysy Sý Arnasy» KMK-nyń baspasóz qyzmetinen málim etkendeı, búgin, 10 jeltoqsanda jergilikti ýaqytpen saǵat 15:00-ge deıin eki sý tazartý qondyrǵysy muzdan tazartylyp, iske qosylǵan. Al, súńgýirler úshinshi sý tazartý qondyrǵysyn muzdan tazalaýdy jalǵastyryp jatyr. 

Belgili bolǵandaı, keshe, 9 jeltoqsanynda saǵat 23:30 shamasynda sý berý toqtatyldy. Buǵan Jaıyq ózenindegi qabyrshaq muz qalyptasyp, sý alýǵa qıyndyq týdyrǵan. 

«Qazgıdromet» RMK Atyraý oblystyq fılıalynyń málimetine súıensek, sońǵy aptada shyǵystan jel soǵyp, teńiz deńgeıi 40 sm-ge tómendegen. Bul Jaıyq ózeninde de sý deńgeıiniń tómendeýine áser etken. 

Al, mamandar qabyrshaq muz ózennen sý alýǵa kedergi keltiretin birneshe sebepti týyndatatynyn alǵa tartyp otyr. Birinshiden, sý jınaıtyn qurylǵylar biteledi. Óıtkeni, usaq muz krıstaly balyq qorǵaý torlaryn, sý jınaıtyn jabdyqtyń basqa elementterin bitep tastaýy múmkin. Bul sý jınaýdyń tıimdiligin tómendetedi. 

Ekinshiden, jabdyqtyń buzylýyna yqpal etedi. Ózendegi sý aǵysymen qabyrshaq muz jeńil qozǵalady. Ásirese, muz krıstaldary úlken bolsa, nemese tyǵyz jınaqtalsa, sý alatyn jabdyqqa mehanıkalyq zaqym keltiredi.

Úshinshiden, mundaı faktorlar sý sapasynyń tómendetedi. Muzben birge ártúrli lastaýshy zattar júrýi múmkin.

Tórtinshiden, sý aǵysyna kedergi keltiredi. Keıbir jaǵdaıda qabyrshaqty muz sýdyń qalypty aǵysyna kedergi keltiretin tyǵyz klasterler túzýi múmkin. Al, bul sý jınaıtyn qurylǵylardyń tıimdiligine keri áser etedi.

«Atyraý oblysy Sý Arnasy» KMK sý tazartý qondyrǵylarynyń basshysy Borıs Penkınniń aıtýynsha, ózende qabyrshaq muzdyń tyǵyz massasy paıda bolǵan. Mundaı qubylys shamamen 20 jyldan beri baıqalmaǵan.

«Bıyl Jaıyq ózeninde sý deńgeıiniń kúrt tómendegeni baıqaldy. Máselen, keshe, 9 jeltoqsanda keshki birneshe saǵatta sý deńgeı 15-20 sm-ge tómendedi. Usaq muz krıstaldary sý jınaıtyn jabdyqqa ornatylǵan qorǵanys torlaryn bitep tastady», - dep málim etti Borıs Penkın.

Eske sala ketelik, budan buryn Jaıyq ózeni qatyp, Atyraý sýsyz otyrǵanyn, ákimdikte komıssııa qurylǵanyn jazǵan edik.